الجرنان

خبي عيونك ورا نضارتك
وإسرح يلا مع الجرنان
إنسي همومك وقرف يومك
أو إنك مخنوق طهقان
شوف الجرنان بيقول إيه
إنسي مشاكلك وإنت بتقرا
م الأخبار إتخيل بكرة
وإسرح فيه
أما صحيح أخبارنا تفرح
حاجة تسر مشاعرك خالص
أخبار تشرح
حرب شمالاً....... قمع جنوباً
ألف قتيل غير المتجرح
دم ف كل مكان يابلادي
هي صحيح دي جريدة أمة...؟!!؟
ولا دي تبقي جريدة المدبح؟!!؟
........ مين إجتمعوا
........ مين إتفاوضوا
مين راح يتنازل عن أرضه
.... مين بيصرخ
مين بولاة العدل إستنجد
....... مين متحاصر
...... مين مهزوم
مين توقيت إعدامه إتحدد
لأ...... وبنتفشخر وبنطبع ف الجرانين
أخبار إيه؟ .... وسياسه إيه؟!؟
مش قبل مانعمل أسياد ...........0
نخد ألقاب......"بني اّدمين"؟؟!!؟
إقلب أول صفحه وسيبك
من أخبار مابنفهمهاش
يلا نخش علي الأخبار اللي تمثلنا
من دعم وتعليم ببلاش
شوف الأخبار إزاي حلوة
قال إيه التعليم مجاني
هيجيبوا دقيق في التموين
والكستور راح يرجع تاني
والأحوال في الدولة تمام
كله مقيد بالتسعيره
ووشونا وحشها التكشيره
ورغيف العيش لسه بخيره ومش بيكش
ولا سوق سودة.... ولا فيه غش
ووزير الصحه بيتشنك
التطعيم واصل ف معاد
وجميع الأطفال أولاده
لا هيتخلي عن مصالحهم
وهيعمل كل اللي ف إيده
علشان ف العيشه يريحهم
خلي وعوده هنا ف مترحهم

ف وعودهم نصحي وبنبات
سيبك يلا من أخبار المجتمعات
وإدخل علي صفحات المسرح والسينمات
إيه أخبار التلفزيون؟
فنان إتجوز فنانه
معجب بيطارد في فلانه
عشرين فيلم جديد إتصور
أفلام الأيام دي تحير
وصناعة السينما بتتدهور
وبتوع الإنتاج إتسعروا
مع إن جيوبهم مليانه
سيبك منهم دول أحوالهم مش شغلانا
ولا ف الصورة
وإدخل علي صفحات الكورة
إيه أخبار الدوري العام؟؟
نجم الملعب ...بعد الماتش
واقف يعطس...... جاله زكام
ومدير نادي بيشتم لاعب
حال الكورة كله متاعب
والحكام عملم تسعيرة
"عاوز تكسب؟؟ ........ تدفع كااااااااااااااام؟""0
بصراحه ظروف أي كلام
ركز حبة كمان ويايا
صفحه خطيرة
موضوعها" حوادث وقضايا"0
إحذر نشال الأتوبيس
حادثه شنيعه طريق بلبيس
"مدمن يقتل أم ولاده"0
حين إستسلم للتحشيش وكلام إبليس
طلبات خلع وحكم طلاق
السفاح الاّن في بولاق
وفرح شعبي إنتهي بخناق
بس خلاص أصل أنا مش ناقص
........ خايف بعد شويه يقولوا
"عادت من تاني النداهة.....
خبوا ولادكم جوا البيت"0
أصل الجرنان حاله......متاهة......
دنيا كبيرة من الحواديت
مش فاضل غير صفحه وحيدة
مفقود.... إعلان...... ووفيات"0
تيجي بسرعه نبص عليها
ولا أقولك.......... يلا بلاش سيرة الأموات
أقلع من تاني النضارة
طبق وبسرعة الجرنان
ماتشيلش ف نفسك أحزان
وإحمد ربك
إنك رغم جميع اخباره
قادر تفضل يوم ........... إنسااااااااااان