صفحة وإنقلبت

وبرجع تاني للأوضة اللي مقفولة علي الأحزان

وأبص لصورة في البرواز

وأتوه وأسرح في أحلامي اللي مكسورة في قلب قزاز

بيتوجع وبيدمع

وبين اوراقه يتأمل

وإيده بتقلب الصفحه

وبيحاول يعيش تاني

ويبدأ عمر م الأول

ولكن قبل ما بيقلب

ووسط كتير من الأحلام

عترت في حلم كان ملكي

حلمته زمان

بعاشق يشبه الفرسان

بيخطفني من الدنيا.........من الأحزان

ويهرب بيا برة الكون

بقصة حب مجنونة وشوق مجنون

وبسرح تاني في القصة وفي فصولها

في أول مرة نتقابل وأول كلمة بنقولها

وأول مرة بنسلم

وأحس بإيدى_م الذكري_بتتألم

وأضم لصدري تذكرتين في يوم فرقة قطعناهم

عليهم لمسة من إيدك.......

ومن يومها......... في قلبي لسة شيلاهم

وأحن بشوق للحظة عشق تجمعنا

ونحكي كتير .......... يتوه صوتنا

ونصرخ جوا في سكوتنا

بحن بشوق للمسة إيد وحضن كبير

وأفوق علي ورقة في إيديا

تفكرني بإنك حلم

بإنك صفحة وإنقلبت بقالها كتير

وإنك ذكري مش أكتر

وأفوق فعلاً من الأحلام وم الذكري

وأبص بحزن للدفتر

وأبدأ صفحة م الاول

وأبدأ عمر

وأكتب كلمة مشتاقة في أول سطر

..... " قرار مجنون"..........

بحبك صفحة وإنقلبت

بحب الأوضة والبرواز

وهستناك في يوم ترجع

أنا وصورة وتذكرتين

وأحلامي اللي مكسورة في قلب قزاز