طفّي النيون
دي رواية هادفة للجنون
نزل ستاير مسرحك
دا العرض كان ملهوش زبون
هد الديكور
والإعلانات
شيل الكراسي م الصالات
بعد الحكاوى والكلام
أهو جه خلاص وقت السكات
شباك تذاكرك
إقفله
العرض فركش
بطلنا تاني نمثله
بطلنا نتلون ونرسم فوق وشوشنا
ألف وش
بطلنا نضحك
وإحنا جوانا الألم
بطلنا غش
بطلنا نبقي البهلوان فوق الحبال
نحفظ ونحفظ في الكلام
إتقال كتير
وإتعاد كتير
لسنين طوال
كام قلب غيري
وقلب غيرك
مثلوا نفس الرواية
وأنا وإنت
قاعدين في الصفوف
وبنبتسم اّخر الحكاية
ونقول
نهاية إتكررت ...ليه الملل؟
عنهم أكيد راح نختلف
تسمح لقلبك يعترف
من غير خجل
ليه إفتكرنا إننا
فوق السيناريو والجُمل؟
ليه إفتكرنا إننا
نقدر نكون
غير البشر
فوق القدر
فوق الفنون؟
حلم الخلود في العشق
وصلنا الجنون
وأدينا برضه بننتهي نفس النهاية
ضاعت ملامح حلمنا
وبقينا نشبه
للي وقفوا ع المسارح قبلنا
مش باقي من كل الصخب
غير السكون
لاقدرت تصبح شكسبير
ولا حتي نفسي
قدرت أكون
وعشان كدة
من غير خجل
نزل ستاير مسرحك
وإطفي النيون
هناك 37 تعليقًا:
تحفه يا مى
بجد بوست حلو اوى
بس الحزن زياده شويه
الجزء ده حلو اوى
وأدينا برضه بننتهي نفس النهاية...ضاعت ملامح حلمنا
وبقينا نشبه للي وقفوا ع المسارح قبلنا
فعلا يابنتى مسرح الحياه فيه العجب ناس بتنزل علشان ناس تطلع مكنها وناس بتكون دوبلير بغيرها
وهيه مش عرفه
ربنا يقويك يابنتى وزيح عنك الحزن
مش عارفة اقلك ايه
بس اكيد لو مكنش عجبني كنت رقيت ومشيت مكنتش فكرت اني اعلق عليه
رغم اليأس..والانكسار برضو حلو
يأس حلو لو كنت اقدر اقول كلمة زي دي
لو كان في كلمة زي دي اصلا
بس يمكن اليأس ده هو الي بيطلع احسن حاجة فينا ده مبدأ انا مقتنعة بيه جدا
hamza
أنا سعيدة جداً بتعليقك...وخصوصاً إنك اول واحد يعلق
متشكرة ليك جداً
محض روح
ميرسي يادندون ياقمر...شفتي السيرفر غلبني إزاي علي بال ماعرفت اعمل البوست؟!!؟
عموما ميرسي ع الدعوة الحلوة دي
بيسوو
إحنا كلنا متفقين إن الحزن إحساس مبدع..بس برضه أكيد مش إحساس مستمر...وده اللي مخوفني ...لو نسيت أحزاني _عفواً_ قصدي تناسيتها فممكن ما أقدرش أكتب تاني
عموما:الحمدلله إن البوست عجبك
تحياتي للجميع
اممممممممممممممممم
على كده انا كنت مش مرغوب فيا في اول كومنت
؟؟؟
ماشي
بس على فكرة يا جماعة
هي مش حزينة ولا حاجة
اقروا البوستات اللي قبل كده حتلاقوا ان مي في تحسن بس تحسن بطيء
عموما يامي
حفظك الله ورعاك .. وسدد على طريق الإيمان خطاك
و ربنا يقويك يابنتى ويزيح عنك الحزن
:D
جميييييييييييييييييييل يامي
مش عارفة ليه فكرتينى بصلاح جاهين وانا بقراها
مش باقي من كل الصخب غير السكون
لاقدرت تصبح شكسبير...ولا حتي نفسي قدرت أكون
..........................
لو كان الحزن هو اللى مخليكى تبدعى كدة فأنا هدعيلك تفضلى طول عمرك حزينة
ههههههههههههههه
..........................
مش باقي من كل الصخب غير السكون
لاقدرت تصبح شكسبير...ولا حتي نفسي قدرت أكون
............................
الله عليكى يا مى
الله عليكي
كام قلب غيري وقلب غيرك مثلوا نفس الرواية
تعبير جميل جدا .. كل الأحداث فعلا بتعيد نفسها وبتتكرر وما فيش حد بيتعلم حاجة
أسجل إعجابي بشعرك اللي باللغة العامية لتاني مرة
هذه المرة لم أتى ليكى كمدون يقرأ ما تكتبين
و لكن كمودعا لاحد اصدقائى المدونين والذى عشقت زيارتهم بأستمرار
و لكن سوف اظل ازور مدونتك الرائعة و اكتب تعليقاتى بها على أمل ان اعود للتدوين مرة اخرى فى يوما ما و لحظة ما
تحياتى لكى ايها المدونة المتميزة
و اسمحى لى قبل الانصراف ان اسمح لنفسى بأضافة الاميل الخاص لكى حتى يظل التواصل بأذن الله
استودعكم الله
بمنتهى البساطة وبدون مجامله
تحفه رائعه
اقولها من كل قلبى وبأمانه
لماذا؟؟
لأنه من السهل على اي انسان ان يكون شاعر .. مجرد بضع كلمات مذيله بالقافيه ويكون لديك مجسم قصيدة او خاطرة
ولكنها منزوعة الحياة والمعنى
اما هنا فى هذا البوست
فلديكى موضوع وتداخلات نفسية واستخدام رائع للمفردات واستغلال اروع للمصطلحات
خالص تحياتى
ودمتى بألف خير
شادي
إزاي بقي الي بتقوله ده؟؟...أنا حتي زعلت منك...مش عوايدك تتأخر علينا كده
وبعدين تعليقك كأول تعليق أنا خلاص بقيت أعتبره جزء من البوست والمدونة بشكل ثابت
وعلي فكرة حكاية التحسن البطئ دي بجد
وعموما ميرسي ع الدعوتين الحلوين دول
هههههههههه
همسات
ميرسي ليكي ياقمر
بس صلاح جاهين نرة واحدة؟؟..ده شرف أنا مش قده
عاشور
مكنتش اعرف إنك بتعزني اوى كده يا أستاذي ياللي واحشني جداً ودايما بتتأخر في متابعتك لتلميذتك دايماً كده
بيتهيألي إنت مش مؤمن بالردود التقليدية علشان كده مش هقولك"شكراً"0
بس والله بفرح لما بشوف تعليقاتك الحلوة
يامراكبي
انا متشكرة جداً جداً جداً علي المتابعة المستمرة دي وع التعليقات التحفة
وإسمحلي أسجل شكري ليك أنا كمان لتالت مرة
معتز شلبي
مش هسألك في إيه لأني مريت بالتجربة دي قبلك وعلي رأي أستاذي عاشزر قلت .."إلإعتزلت الغرام"0
والنبي بلاش حكاية مودع دي ..أنا عن نفسي مافكرتش مجرد تفكير إنك ممكن ماتبقاش موجود
بجد هزعل لو إختفيت كمدون...وبالنسبة لحكاية الميل فأنا تحت امرك وده شئ يشرفني
أشكرك ع الكلمتين الحلوين اللي في حقي دول
ساكاماكانيوز
الله الله الله ع الكلام الجميل
أشكرك بشدة علي التعليق المبدع ده
بصراحه حاجه تفتح النفس
تحياتي للجميع
ايوة كده
بجد وحشني كلامك الجميل
مش عارف اقولك ايه ع الكلام الرائع ده
بجد كلام رائع و تشبهات اروع
انتي بجد فنانه يا مي
كريم
كريم
إنت اللي وحشتنا
غايب فين المدة دي كلها
متشكرين ياباشا ع الكلام الحلو ده
وماتغيبش علينا تاني
إسمها نهاية اتكررت ولا طفى النيون ؟؟
اه ، نهاية اتكررت
اصلي والله سرحت فيها كتييير من كلامها
الله عليكي يا مي وعلى أعمالك الأدبية
أعمال أدبية لانك أكيد بتتعبى قوى قوي عشان تكتبي الكلام الرائع ده وتربطى الأفكار بالطريقه الممتازة دي
تحياتي أولا ليكي
و لملاحظة شادى الممتازة
ولاختيار عاشور اللى استأذنه أشاركه فيه :
مش باقي من كل الصخب غير السكون
لاقدرت تصبح شكسبير ، ولا حتي نفسي قدرت أكون
سلامة
ولو إن تعليقك إتأخر أوى...بس الكلام اللي يرفع من الروح المعنوية اللي قلته ده بالدنيا كشهادة من كاتب عبقري قبل مايكون صديق رائع
.........
عجباني أوى نزعة التضامن اللي في كومنتك مع كلام شادي وعاشور
إنت بقي ليك في السياسة من ورايا؟!!؟
بجد كلامك الجميل ده كتير عليا أوى
رائع
انتى موهوبه بجد
خالص مودتى
free.pharaoh
تعليق صغي من حيث عدد الكلمات لكن كبير عليا اوى من حيث المعني والقيمة
وعموما أشكرك وشرفتني
نهاية اتكررت آه، لكنها مش مملة. لأن البشر بطبعهم نسايين، وبيحلموا لحد ما يعيشوا حلمهم وبعدين "يفاجئهم" انه ما اتحققش وانه ما كانش مميز وانه مشي في نفس السكة اللي مشي فيها حلم اللي قبلهم!
جميلة .. جميلة... وحزينة!
د/أحمدالشمسي
بذمتك مش مأساة إننا كبشر نكتشف إننا مخلوقات لاتستفيد من التجربة
أنا فاكرة تقسيم قاله "فايز البهجورى "للبشر قال فيه:الناس تنقسم مابين أذكي وذكي وغبي...الأذكي هو اللي يستفيد من تجارب غيره من غير مايمر بيها هو والذكي اللي يمر بالتجربة مرة واحدة ويتعلم ومايكررهاش أما الغبي هو بقي اللي يغلط الغلطة ومايتعلمش ويكررها بإنسيابية....ودلوقتي بس أنا عرفت أنا
في أي
category
شكرا ليك يادكتور ومعلش صدعتلك دماغك بردي المسهب علي كومنتك
وميرسي علي رايك الجميل في القصيدة
إييييه ده إيه ده .. أنا شفت تعليق ليكي عند همسات قلب وفهمت انك بتحبي الأدب قلت أشوف بتكتب في ايه بس أنا في غاية الإعجاب بهذا القلم .. انا مش حاعلق على شئ الآن لكن لي عودة إن شاء الله تقبلي تحياتي وإلى مزيد من التألق أخت مي
السلام عليكم
ازيك يا مي
اقصد يافنانة
رائعة والله يامي في كتاباتك كلها
ما شاء الله
بطلنا نبقي البهلوان فوق الحبال
نحفظ ونحفظ في الكلام...0
إتقال كتير ..وإتعاد كتير لسنين طوال
كام قلب غيري وقلب غيرك مثلوا نفس الرواية
وأنا وإنت قاعدين في الصفوف
وبنبتسم اّخر الحكاية
ونقول "نهاية إتكررت ...ليه الملل؟!!"0
"عنهم أكيد راح نختلف"0
بجد كلام مش اي حد يكتبه او يوصفه بالشكل الهايل دا
ربنا يسعدك وتسعدينا معاكي
سلام
جيد الاسبوع
متأخر..عادي مانتي عرفتي طبعي بقي..
حاسس ان فيها نبرة تحدي عالية قوي..المعني اللي بيقوله اي حد خارج من قصة حب قوي مش ضعيق..انا مش اول واحد ..معنتش مجبر اني لما ابقي مضايق اضحك ولا اتكلم وانا مش عايز اتكلم
رائع يامي..منتهي التحكم ..حاجة بالقوة دي كانت ممكن تفات منك
تحياتي
يلا سلام
صلاح جلال
أنا اللي في غاية السعادة بالزيارة الجميلة دي...ويارب دايما عند حسن الظن وأتمني ماتكونش اّخر زيارة لينا
في إنتظار زياراتك
nour/nour
وعليكم السلام
الله يسلمك....إيه الكلام الجميل ده كله؟!!0
ربنا يخليك وإنشاء الله مستمرين بالدعوات الحلوة دي
شرفتني
david santos
؟؟؟؟؟؟؟؟؟؟؟
عموما....شرفتني بالزيارة
أحمد عيسي
المرة دي مش بس مش أول تعليق...ده إنت إتاخرت أوى...بس يلا....سماح المرة دي كمان
يا أحمد بجد أنا مش قد تعليقاتك الجميلة دي...الله يكرمك يارافع من روحي المعنوية
شكراً ليك يا أحمد
بصى بقولك ايه كلماتك حركتنى اوى
وبهديكى الكام بيت اللى جم على بالى دلوقتى
الحب مش لينا
الحب لناس تانين
الحب وردة مفتحة
واحنا لسة مغمضين
الحب كلمة كبيرة خالص
واحنا قلوبنا صغيريين
ده كدخ سبق ليكى لانى لسة مش كملتهم اذا كان ليهم نصيب اصلا يكملوا وانزلهم بعد كده فى مدونتى
الف شكر لأحساسك الجميل
أنا معجب جداً بثقافتك المسرحية والتشكيلية المنعكسة على كلماتك
وعلى حد علمي أن ليس كل ما يكتبه الشاعر أو الزجال هو حالة يمر بها بل أحيانا يستحضر حالة فرح أو حزن ويتفاعل معها ثم يكتب
ولكني أجدك تميلين أكثر إلى الحزن
نفسي أقرا لك كتابات تفاؤلية قريبا
تحياتي
seef el3ashk
ألف شكر لتعليقك الأجمل
وكمل القصيدة...وانا بقي طماعه وهستناها ..عاوزة أقراها أول حد...وعموما اهداء مقبول
شرفتني
أ/ياسر حسين
أنا اللي في قمة السعادة بإهتمامك بقراية كتاباتي الناشئة
ده بجد كتير عليا أوى
بيتهيألي بعد سعادتي بتعليقات حضرتك غني لازم هكتب كتابات متفائلة وسعيدة اوى كمان
شكراً بشدة
تحياتي
أيتها الأديبة العبقرية مى
لقد بحثت كثيرا عن كلام أعبر به عن مدى إنبهارى فلم أجد
بحثت عن بيت واحد أقول عنه أنه أكثر ما أعجبنى كعاشور و سلامة فلم أجد
و لكنى أشكرك كثيرا لأنك ساعدتنى فى إتخاذ قرار كنت مترددا فيه منذ فترة
لقد قررت أن أتوقف عن الكتابة فلا يمكن أن أظل أكتب فى وجود عملاقة مثلك
سأظل أشعر دائما بضآلة ما أكتبه
لذلك قررت أن أكتفى بمتابعة ما تكتبيه و الإنبهار به
و النهاية لا يسعنى إلا أن أقول كلمة واحدة
إيه الحلاوة دىىىىىىىىىىىىىىىه
mr_tea
هتصدقني لو قلتلك إني كنت مستنية زيارتك الجميلة دي من زماااااااااان؟!!؟
ومتشكرة جداً علي كلامك الجميل في حقي ده...ويارب اكون أستحقه بجد
أنا اللي نفسي ألاقي كلام أرد بيه علي كومنتك الرقيق ده
وبلاش حكاية قرار إعتزال الكتابة ده....أولاً"إنت بتبهرني بجد بكتاباتك اللي بتغيب بيها علينا أوى
ثانياً: بلاش تتحسسني إني فعالة أوى كده ...وكمان فعالة بالسلب ....أكيد كتاباتي ماتستهلش كل دة
وأنا مش مستعدة أخسر كاتب حساس زيك
شرفتني بجد ...0
ومتشكرة جداً جداً علي الزيارة اللي كنت بستناها
شريف
أشكرك
تعليقاتك بجد هي اللي اكثر من رائعه
متشكرة جدا علي متابعتك وتعليقاتك الرقيقة المشجعه دي
تحياتي
بجد كلام تحفه جداً
من زمان على فكرة وانا بقرا ليكى
وبجد ربنا يوفئيك
انا مش علطول ببقى فى المدونةنفسى اتعرف عليكى شخصياً
:)
إرسال تعليق