اللي بنا مصر,,,,,,,,,

في يوم من أيام أجازة الصيف اللي فات اللي من شدة حره وصلت لأقصي درجات القريفة لدرجة إني فكرت في الإنتحار بس رجعت عن فكرتي لما إفتكرت إن جهنم حرها أشد.....المهم ....... الساعة إتنين الضهر تقريباً _وده وقت ماحدش يتصل فيه أساساً_لقيت تليفوني بيرن وكانت المتصلة صديقة قديمة علاقتي بيها علي وشك التلاشي كنا زمايل وأصدقاء ايام ثانوى .....نسيت أقولكم إنها بنت أكبر راجل أعمال عندنا في المنصورة بس ده مش معناه انكم تفسروا إني بنهي علاقتي بيها كنوع من الحقد الطبقي لا والله الموضوع يرجع إلي أسباب أخري.............ماعلينا ,,, وكان الحوار اللي دار بيننا بعد سلامات وطيبون والأسئلة معدومة الإحساس الفعلي عن الصحة والأحوال هو كالتالي,,,,,,,,,,,,,,,,,,,,,,:::::
هي:_عندي ليكي خبر حلو
أنا:_ خير إنشاء الله؟؟؟...فرحيني أنا بقالي كتير ماسمعتش أخبار حلوة.
هي:_أختي إتقرت فتحتها إمبارح والخطوبة بعد 3 أسابيع
أنا:_ لأ بجد؟؟؟ والله؟؟ ألف ألف مبروك ...وعقبالنا يارب...بس ما قولتيليش.....علي مين؟؟؟
هي:_ إبن واحد بيزنس مان صديق بابا من القاهرة
أنا:_ماشاء الله ..... ربنا يسعدهم... وهو بيشتغل إيه؟؟
هي:_ يشتغل إيه يابنتي...!! بقولك إبن بيزنس مااااااااااااان
أنا:_[وأنا أستشيط غضباً من الأحوال العجيبة ومن جوايا بتحسر علي إبن عمي اللي عنده 32 سنه ولحد النهاردة هو واللي بيحبها مقضيينها بحث في الوظايف الخالية].....اّّّّه معلش ياجميل ما أخدتش بالي.........العتب ع السمع.
هي:_ هو ماسك إدارة مصنع من مصانع باباه
أنا:_ هو خريج تجارة؟؟؟
هي:_ لأ ....صيد لة خاصة من جامعة أكتوبر زى أختي تمام
أنا:_ ربنا يتمم بخير.
هي:_ أكيد طبعا انتي مش محتاجة عزومة...... لازم تيجي الحفلة
أنا :_ طبعا طبعا...... هتعملوها في انهو نادي بالظبط؟؟؟
هي:_ لأ طبعاً مش في نوادي... عندنا في في الفيلا اللي في مارينا.... وعل فكرة هشام عباس هو اللي هيحيي الحفلة
أنا:_ واللله؟؟؟ هشام عباس مرة واحدة؟؟ ماشاء الله
هي:_ طبعاً ...أمال ايه؟؟ وكمان فرقة رقص برازيلي .... علشان الفرح هيحضره شخصيات مهمة كتير.
رجال أعمال.... مصريين وألمان من اللي بابا شغله معاهم..........صحفيين......... يعني تقدري تقولي...{كريمة المجتمع} ولازم الفرح يليق بيهم
أنا:_{وأنا اخفي الكثير من الغيظ والتعجب في نفس الوقت من هذا التقسيم الطبقي الملذ ق} ربنا يزيد ويبارك. { وتداركت نفسي وقلت}...انشاء الله الفرح يوم 21_8؟؟
هي:_ ايوة
أنا:_إنشاء الله نتقابل هناك وعقبالك
هي:_إنشاء الله.
أنا:_ هتعزمي باقي العيال؟؟
هي:_هشوف.....بس ممكن مش كلهم
أنا:_{ لأني مش طايقة أسأل ليه أو أطول في الكلام}...طيب يا حبيبتي أوكي...وباركيلي للعروسة كتير لحد ما أبارك لها بنفسي
هي:_ الله يبارك فيكي ولازم نشوفك
أنا:_ إنشاء الله
هي:_ سلام
أنا:_ سلاااااام
وإنتهي الحوار وأنا سرحانة ومخنوقه ...... بس فوق إني خرجت من الحوار ده بضغط عالي _وده في مصلحتي لأني مريضة ضغط منخفض_ فأنا خرجت منه بقناعة شديدة بعبارة إتغنت قديماً في تتر مسلسل تأريخي شهير،،،، العبارة دي كانت بتقول.......
إللي بنا مصر كان في الأصل.........حلواني

تمت
عفواً:::: نسيت أقولكم إني مارحتش الفرح............أصل الدكتور مانع عني الحلو..