21‏/06‏/2008

بلياتشو


بلياتشو
بيبكي علي المسرح
بعد الجمهور
قدامهم كان إنسان تاني
مخلوق مسحور
يتفنن

في الصوت الرايق
يتفنن
في الضحكة البنور
مع إنه كتي

بيكون جواه
إحساس مكسور
تجاعيد أحلامه

بيخفيها تحت الألوان
يدخل في البدلة الفرحانة

ويعمل فرحان
في ضلوعه

بيسجن أحزانه
وفي ضحكة جمهوره
السجان
وياهم يضحك

وعليهم
علي نفسه بيضحك
قبليهم
محتاج لــ سكوتهم

مش أكتر
مش وردة
وسقفه علي إيديهم
زهقان من صوتهم

وجنانه
زهقان
من زحمة ألوانه
وبيحلم
لو يعرف نفسه
محتاج
لــ ملامح إنسانه
مسرح كداب

و رواية فشوش
من حقه يأن ويتوجع

ويمل من الضحك المغشوش
ماهو مش معقول

يفضل مسجون
ورا وش ملامحه ماتشبهلوش
كاره غشه
محتاج يرجع جوا الكواليس
بعد مايمشوا
في مراية بعيدة عن الألوان
يلمح وشه
يضحك
من تاني
بــــــــــــــــــــــــ
صوت عالي
علشان
في عنيهم
كان شايف
جواهم
نفس البلياتشو

هناك 16 تعليقًا:

Unknown يقول...

عجلني قوي الكلام ده مع انو بالعامي بس حلو بجد
ربنا يكرمك كلام فعلا له معنى محدش بيحب يبقى بلياتشو للضحك وبس بدون هدف
تحيتي وأنتظر زيارتك على مدونتي

ساعه الغروب يقول...

gh f wa2to sa7 awi el post da

msh l2ya kalam 3'er merci bgd

adam allah 3liki e7sask

ya rab bs tkoni b5er

محض روح يقول...

وصلتي الاحساس ببراعه
جميل البلياتشو والاجمل ان انك انتي الي كتباه
مي
الحياه مش بلياتشو وجمهور ؟

Mina يقول...

حلوة قوووووووووي بجد حلوة قووووي يامي اد ايه لمست قلبي
جات علي الجرح يعني والله كنت هاعيط
تسلمي

محمد العدوي يقول...

فكرني بالضاحك الباكي لهوجو ..


على الوجه ابتسامة .. وهو ميت بالأساس.

كل الود .

غير معرف يقول...

محتاج يرجع جوا الكواليس بعد مايمشوا...
في مراية بعيدة عن الألوان يلمح وشه....
يضحك من تاني بــــ صوت عالي....
علشان في عنيهم كان شايف...
"جواهم نفس البلياتشو


رااااااائعة
قدرتك بتبان لما بتخليني مش عايز القصيدة تخلص

قلب ينبض لله يقول...

لا بجد معبرة جدا ومؤثرة جدا
كلماتك سابت فيا خط حزين وصعب عليا جداااا

عارفه اهم حاجه ايه اللي لازم ناخد بالنا منها اننا مانتحولش للبلياتشو دا من غير مانحس

تحفه

Mina يقول...

قصاقيصك جميلة جداااااا تحفة بجد بس العيب انها قليلة قوي ياريتتمتعينا بالجمال ده اكتر من كدة شوية
مستني اقرا حاجة قريب
تحيااااااتي

الاسطى يقول...

باعلق بسرعة بسرعة بسرعة علشان ألحقلى مكان .. و بالمرة أباركلك ألف مرة يا مى على الرجوع ... الى أكيد قوى كالعادة مع إنى ما قريتشى ولا حرف .. ألف مليون حمد الله على السلامة .. و راجلعك تانى بالتعليق

الاسطى يقول...

الف مليون مبروك يا مى على رجوعك ..
انا جاى بسرعة بسرعة أعلق قبل حتى ما أقرى حرف واحد .. أحجزلى مكان قبل ماحد ييجى ..
مع إنى عارف إنها عودة قوية كالعادة ..
حمد عالسلامة ..
راجعلك انى بعد القراية

الاسطى يقول...

تجاعيد أحلامه بيخفيها تحت الألوان...

يدخل في البدلة الفرحانة ويعمل فرحان


ويمل من الضحك المغشوش


كاره غشه...

في مراية بعيدة عن الألوان يلمح وشه....

منتهى .. منتهى الجمال ... "مش إعلان زيت ولا حاجة " ..

بس أقولك على حاجة حلوة ..؟
عندك حاجات أقوى من كده ألف مرة ..
و انتى عارفة و انا عارف ...
مستنيكى عندى ..

محمد فكري يقول...

رائع بجد..
القصيدة دي عجبتني جداً..
قد تكون أول زيارة...
ولكن..لن تكون الأخيرة بإذن الله :)
شكراً..

رجل من غمار الموالى يقول...

رائع يا أخت مى

حزينه يقول...

السلام عليكم
احنا كلنا جوانا بلياتشو
نضحك وجوانا كسور
ونتكلم واحنا بنفضل السكوت
نعمل حاجات مش عايزين نعملها بس لازم نعملها
البلياتشو الناس بتضحك عليه فى السيرك
واحنا بنضحك على نفسينا بينا وبين نفسينا



حزينه

حزينه يقول...

بلياتشوا
والله دنيتنا فيها مليون بلياتشوا
انا اول واحدة فيهم
كلامك جميل وبيوجع

البوست تحفه


حزينه

محمد على يقول...

إستمتعت جداّ بالكلمات التى صيغت بحرفنه .. ( بلياتشو ) صورة مرسومة بعنايةأحييك على إبداعك .. سأكون هنا على الدوم .. ولن أنتظر زيارتك فليس لى مكان يستحق أن تزوريه .. ربما أستطيع أن يكون لى ...