بلياتشو
بيبكي علي المسرح
بعد الجمهور
قدامهم كان إنسان تاني
مخلوق مسحور
يتفنن
في الصوت الرايق
يتفنن
في الضحكة البنور
مع إنه كتي
بيكون جواه
إحساس مكسور
تجاعيد أحلامه
بيخفيها تحت الألوان
يدخل في البدلة الفرحانة
ويعمل فرحان
في ضلوعه
بيسجن أحزانه
وفي ضحكة جمهوره
السجان
وياهم يضحك
وعليهم
علي نفسه بيضحك
قبليهم
محتاج لــ سكوتهم
مش أكتر
مش وردة
وسقفه علي إيديهم
زهقان من صوتهم
وجنانه
زهقان
من زحمة ألوانه
وبيحلم
لو يعرف نفسه
محتاج
لــ ملامح إنسانه
مسرح كداب
و رواية فشوش
من حقه يأن ويتوجع
ويمل من الضحك المغشوش
ماهو مش معقول
يفضل مسجون
ورا وش ملامحه ماتشبهلوش
كاره غشه
كاره غشه
محتاج يرجع جوا الكواليس
بعد مايمشوا
في مراية بعيدة عن الألوان
يلمح وشه
يضحك
من تاني
بــــــــــــــــــــــــ
صوت عالي
علشان
في عنيهم
كان شايف
جواهم
نفس البلياتشو
هناك 16 تعليقًا:
عجلني قوي الكلام ده مع انو بالعامي بس حلو بجد
ربنا يكرمك كلام فعلا له معنى محدش بيحب يبقى بلياتشو للضحك وبس بدون هدف
تحيتي وأنتظر زيارتك على مدونتي
gh f wa2to sa7 awi el post da
msh l2ya kalam 3'er merci bgd
adam allah 3liki e7sask
ya rab bs tkoni b5er
وصلتي الاحساس ببراعه
جميل البلياتشو والاجمل ان انك انتي الي كتباه
مي
الحياه مش بلياتشو وجمهور ؟
حلوة قوووووووووي بجد حلوة قووووي يامي اد ايه لمست قلبي
جات علي الجرح يعني والله كنت هاعيط
تسلمي
فكرني بالضاحك الباكي لهوجو ..
على الوجه ابتسامة .. وهو ميت بالأساس.
كل الود .
محتاج يرجع جوا الكواليس بعد مايمشوا...
في مراية بعيدة عن الألوان يلمح وشه....
يضحك من تاني بــــ صوت عالي....
علشان في عنيهم كان شايف...
"جواهم نفس البلياتشو
رااااااائعة
قدرتك بتبان لما بتخليني مش عايز القصيدة تخلص
لا بجد معبرة جدا ومؤثرة جدا
كلماتك سابت فيا خط حزين وصعب عليا جداااا
عارفه اهم حاجه ايه اللي لازم ناخد بالنا منها اننا مانتحولش للبلياتشو دا من غير مانحس
تحفه
قصاقيصك جميلة جداااااا تحفة بجد بس العيب انها قليلة قوي ياريتتمتعينا بالجمال ده اكتر من كدة شوية
مستني اقرا حاجة قريب
تحيااااااتي
باعلق بسرعة بسرعة بسرعة علشان ألحقلى مكان .. و بالمرة أباركلك ألف مرة يا مى على الرجوع ... الى أكيد قوى كالعادة مع إنى ما قريتشى ولا حرف .. ألف مليون حمد الله على السلامة .. و راجلعك تانى بالتعليق
الف مليون مبروك يا مى على رجوعك ..
انا جاى بسرعة بسرعة أعلق قبل حتى ما أقرى حرف واحد .. أحجزلى مكان قبل ماحد ييجى ..
مع إنى عارف إنها عودة قوية كالعادة ..
حمد عالسلامة ..
راجعلك انى بعد القراية
تجاعيد أحلامه بيخفيها تحت الألوان...
يدخل في البدلة الفرحانة ويعمل فرحان
ويمل من الضحك المغشوش
كاره غشه...
في مراية بعيدة عن الألوان يلمح وشه....
منتهى .. منتهى الجمال ... "مش إعلان زيت ولا حاجة " ..
بس أقولك على حاجة حلوة ..؟
عندك حاجات أقوى من كده ألف مرة ..
و انتى عارفة و انا عارف ...
مستنيكى عندى ..
رائع بجد..
القصيدة دي عجبتني جداً..
قد تكون أول زيارة...
ولكن..لن تكون الأخيرة بإذن الله :)
شكراً..
رائع يا أخت مى
السلام عليكم
احنا كلنا جوانا بلياتشو
نضحك وجوانا كسور
ونتكلم واحنا بنفضل السكوت
نعمل حاجات مش عايزين نعملها بس لازم نعملها
البلياتشو الناس بتضحك عليه فى السيرك
واحنا بنضحك على نفسينا بينا وبين نفسينا
حزينه
بلياتشوا
والله دنيتنا فيها مليون بلياتشوا
انا اول واحدة فيهم
كلامك جميل وبيوجع
البوست تحفه
حزينه
إستمتعت جداّ بالكلمات التى صيغت بحرفنه .. ( بلياتشو ) صورة مرسومة بعنايةأحييك على إبداعك .. سأكون هنا على الدوم .. ولن أنتظر زيارتك فليس لى مكان يستحق أن تزوريه .. ربما أستطيع أن يكون لى ...
إرسال تعليق