13‏/05‏/2008

ألــــبــــوم


تيجي نقلب في الألبوم....؟؟
اللي إنت هاديتهولي زمان...
يمكن نحلم .... أو نتخيل...
تيجي نحاول نلقي أمان...؟؟

أول صورة....
صورتي وصورتك
هيصة وزحمة في الألوان
مع إن التصوير بهتان
فاكر مين اللي لقطهالنا؟؟
واحد كنا مانعرفهوش....
بس إتبسم لما لقانا بنحضن بعض ف وسط ميدان
ياااااااااه لو كنا فضلنا هناك.....
نفس المشهد.....
تحت التمثال الهلكان

أما التانية....
صورتك وإنت بتاكل تين...
لسه فاكرها؟؟
ما إنتا عارفني.....
بعشق صدق البني اّدمين
كنا بناكل بس سبقتك..
وفاجئتك بفلاش الكاميرا
وخدعتك وقوام صورتك
رغم إنها طلعت مهزوزة...
لكن حلوة...
بتفكرني بلحظة بترفض ترجع تاني....بس بجد....!!
عنيك وحشاني

ركز.. ركز..
" تالت صورة "

صورتي اللي أنا بدلع فيها تحت المطرة
فاكر يومها...
عز البرد وبرضو بنجري... كانت فكرة
ياما واحشني البرد الدافي فوق الكوبري
قلبي وقلبك...
صوت أنفاسنا وإحنا بنجري

أما الصورة الرابعة حكاية....
اتصورنا بشكل ملخبط...
في المترو....و كنا بنتنطط...
وعملنا من الصورة إتنين
بس إنت إتعصبت يوميها...
ونسيت الصورتين ويايا
تتخيل من يوم مانسيتهم...
والصورتين عايشين جوايا
خامس صورة في الألبوم...
صورة بعيدة
وشي ووشك مش باينين...
فاكر لما الفيلم أتحمض...لما لقيتني هطق وأفرقع م التحميض
قلت:" حبيبتي....أجمل حاجة إنه رسمنا بغير تفاصيل"
يعني خيال... زيي وزيك والحدوته
يعني مجسد مبدأ أحلامنا المكبوتة
"أنا وإنتي روحين مش وشين"
وأنا رديت وأنا لسه بعيط...
" بس دي لحظة وعدت مني..... ممكن تاني أجيبها منين؟؟"

مسحت دموعي بإيدك وإنت بتنطق..
" بصي في ملامحنا التايهين "
سادس صورة ...
كنا بنضحك .... فاكر ليه؟؟
كنا بناكل فول وفلافل
وإنت بكل غرور بتقول...
" هو جروبي يفرق يعني عن هنا إيه؟؟!!"
وأنا بضحك وبرد عليك....
" حتي الأكل قلبته سياسه!!
يابني إرحمني.... وإتكلم في حاجات حساسة"
سابع صورة....
أنا سميتها" صورة أحلامنا المكسورة"
" حتة منظر"
شايف وشك..... كان متغير
كنت مقريف
وانا باين علي وشي الباهت قلب بينزف
كنا في عز أغسطس لكن... كنا بنرجف
يومها ما كناش زى العادة...
والأيام الحلوة السكر... قلبت سادة
كنت مسافر وأنا هتجنن وإنت بتبعد
إيدي وإيدك بعدوا ولكن.... لسه بنوعد
إنك راجع...
وإن أنا راجعه...
بس الظاهر إنك قبل ما تمشي نسيت...
إنك تسأل عن أحلامنا" هتقدر تصمد؟؟""
كانت اّخر صورة بتجمع بيني وبينك
وانا من يومها...
كل ما بزهق من أحلامي...
برجع بقلب في الألبوم...
وألمس وشك...وأسأل فينك؟؟
لسه فاكرني؟؟
ولا نسيت؟؟
فاكر " حب بدون تخطيط"؟؟
فاكر أحلامنا اللخابيط؟!!
سيرة ذاتك......
خط إيديك......
كل الأوراق والشخابيط؟؟؟
كانت أحلامنا بتتقسم علي قلبين....
وأنا بصرخ وإنت بتسمعني...." الدنيا إتقسمت نصين..
قلبي وقلبك..... فين مينا يوحد قطرين؟؟""
وإنت بتضحك وبتحضني
أما صحيح عشاق مجانين
يااااااااااااااااااااااااااااااه
أما صحيح كانت أيام...
عدت لكن سابت عندي...
ألبوم صوري والأحلام
ياما حلمت أشوفك تاني بنفس النظرة
وإنت بتتبسم وتقوللي" إنتي الوطن اللي أنا برجعله
يبقي بلاش يدّخل بكرة"
بكرة وبعدة...
وأيام تانية كتيرة وعدوا...
وأنت ما جيتش...
وأنا بستني...
أنا والذكري والألبوم...
أحلم وقت ما أنام برجوعك ...
وأضمك وأصحي من النوم...
ألمح نفسي في نفس الأوضة ....
مستنية...
إنك ترجع حتي في حلم
وكأنك مخلوق " أمنية"
إتمنيتك قبل ما أشوفك...
وأما لقيتك....برضو بتيعد...وإتمنيتك
وأما لقيتك...
ليه خليتني أقلب تاني في الألبوم؟؟!!
خايفة لتطلع زي عوايدك...
"حلم" وهصحي خلاص م النوم
تيجي نقفل ع التصاوير؟؟!!
تيجي نحكي...؟؟!!
عن أحوالك...
عن أحوالي...
عاوزة أسمعلك...إحكي كتير...
بس إسمحلي قبل ما أقفل...
" نفسي أضمك"

هناك 27 تعليقًا:

حمامة يقول...

هييييييييييييييييييييييه

اول تعليق

هاجى ارد بحجز بس

حمامة يقول...

حلو اوى الألبوم

عجبنى اوى دى

وانا من يومها...
كل ما بزهق من أحلامي...
برجع بقلب في الألبوم...
وألمس وشك...وأسأل فينك؟؟
لسه فاكرني؟؟
ولا نسيت؟؟
فاكر " حب بدون تخطيط"؟؟
فاكر أحلامنا اللخابيط؟!!
سيرة ذاتك......
خط إيديك......
كل الأوراق والشخابيط؟؟؟


كل بداية حلوة نهايتها بتكون مأساوية

ان شاء الله اتمنى لكى نهايات وصور اسعد

منورة من تانى يا مى :)

واوعى تحرمينا منك تانى

حزيــــــــــــــــــن يقول...

very nice work may
i am sorry my key board dosen't support arabic now
so i will come again

Unknown يقول...

أول صورة....
صورتي وصورتك
هيصة وزحمة في الألوان
مع إن التصوير بهتان
فاكر مين اللي لقطهالنا؟؟
واحد كنا مانعرفهوش....
بس إتبسم لما لقانا بنحضن بعض ف وسط ميدان
ياااااااااه لو كنا فضل هناك.....
نفس المشهد.....
تحت التمثال الهلكان



بعشق شعور انك تضحك فى وسط بحر مالاحزان



أما التانية....
صورتك وإنت بتاكل تين...
لسه فاكرها؟؟
ما إنتا عارفني.....
بعشق صدق البني اّدمين


انا بعشق اكتر البساطة فى البنى ادمين يمكن البساطة اصل الصدق
ومن هنا صدق كلامك جاى من بساطتة

غير معرف يقول...

ايه الجمال والعظمة دى حقيقى صدق وبرأة وعفويه ومشاعر لمستنى من جوة وعشت معاكى دقائق ميتحسبوش من العمر واجمل مافى الالبوم ذكريات بمشاعر عالية قوى
حقيقى بشكرك على لحظات الدفئ اللى عشتها معاكى
انا واحدة اول مرة تزور المدونة بس اكيد مش حتكون اخر مرة
نور الفجر

الاسطى يقول...

هييييييييه .. مى رجعت ..
مى رجعت ..
مى رجعت ..
على فكرة أنا حافظ القصيدة دى .. أكتر منك
عارفة لما تبقى حافظة أغنية و بتحبيها أوىىىىىى و دايما تدندنى بيها فى الشارع و انتى ماشية أو حتى تغنيها لناس أصحابك ..ظ
أنا بقى باعمل كده مع القصيدة دى .. و انتى أكتر حد عارف هى غلاوتها عندى أد إيه ..
على فكرة قلتلك قبل كده إن القصيدة دى هى السبب فى حبى للشعر و كتابتى للشعر .. و كمان حبى للتدوين ..
عود أحمد يا مى ..
بس كان نفسى ألاقى حاجة جديدة لانج ..
قوليلى صحيح الحاجات التانية راحت فين ..؟
شنطة ذكريات
عشق سعيد
هقفل الدفتر
شباك قديم
قلب إزاز
كشف حساب
سؤال
طفى النيون
قصاقيص مشاعر
أتحداك
محكمة
و حاجات تانية كتيرة
الحاجات الشديدة اوى دى .. راحت فين يامى
دورى عليها و رجعيهالنا تانى ..
انا زعلان أوى عليها . علشان مش حافظها
أكيد موجودك عندك فى مكان ما ..
دورى عليها و هاتيها و اكتبيها تانى
و هاقولك مرة تانية ..
حمد الله عالسلامة
و بلاش تغيبى تانى بقى

الاسطى يقول...

يانهار مش فايت .. وديتى فين الحاجات التانية يامى ..
أنا بادور دلوقتى فى البلوج ماليتشى غير الموضوع دا ..
طب كده ينفع ..؟
يامى حرام عليكى
حرام عليكى بجد لو كنتى لغيتى الحاجات التانية دى بإيدك و بقرارك انتى
رجعيها تانى لو سمحتى ..
كل المواضيع القديمة و الجديدة اللى اتلغت ياريت ترجعيهالنا تانى ..
انتى مش هاترجعيها ليكى انتى و بس ..
دى لينا كلنا
لكل الناس اللى بيحبوكى و يحبوا شعرك
رجا من واحد عاشق كل حرف كتبتيه
بجد

Haitham El-Menshawy يقول...

بجدوالله عشرة على عشرة ..... عجبتي جدا على الرغممن اني اول مرة ادخل هنا و اقرأ حاجة ... لكن بجد والله مية مية :)

غير معرف يقول...

جميلة جدا جدا جدا
عند قدرة رائعة انك تمسكي القصيدة من اولها لاخرها من غير ماتفلت منك

بس انا حسيتها قوي

basma saghir يقول...

الله..الله..الله

روعة..روعة بجد..اي نعم كلام مبتذل ومتعاد كتير

بس عاجباني قوي قوي

صعب الحنين شوية...بس برضو حلو..مش كدة؟

Dr.Mohammed Gohary يقول...

عجبني من أول مرة قريته

وعجبني تاني
وهيعجبني

لانك بجد مبدعة


تحياتي
وانا آسف اني دخلت كدا
كان لازم استأذن بس شكرا انك سمحتيلي

ومزيد من الاعمال العملاقة
تحياتي

إبـراهيم ... يقول...

ياااه يااا مي، كل ده ، ....
بجد قصيدة حلووووة قوووي، ومليااانة قوووي ، مليانة كل حاجة، مليانة تفاصيل ، وحب ، وإحساس حقيقي ...
.
.
إنتي بجد هااايلة قووووي
.
. سعدت بالمرور هنا، فيييين الحاجات القديمة يا دكتورة :)
.
.
تحياتي

واحد من الناس يقول...

بجد رائعه جدا

أول مره أدخل مدونتك

وإن شاء الله هادخل على طول

بجد إنتي مبدعه جدا

والله جسمي قشعر وانا بقرأ

الإحساس هايل

والأسلوب والأفكار ولا أروع

سلم لنا قلمك

سلام

غير معرف يقول...

احساسك عالي اوي
كلماتك جامدة
انا بجد مسهمة كده من ساعة ما قريتة القصيدة

بجد جميلة

د. محمد الدسوقي يقول...

ما أجمل أحرفك ومعانيك ..
إختيار شاعري غاية في الرقة لألبوم الصور لكي يكون محور قصيدة أكثر شاعرية وعذوبة ...
لمستني الفكرة برقتها وتأثرت إنسانيا بالنهاية ...

تحياتي في معانقتي الأولى لكلماتك ...
دمت بإبداع

سارة درويش يقول...

بجد انا ما قدرتش امسك دموعى لدرجة انى كنت بقرأ اخرها بصعوبة .. بجد انتى مبدعة وموهوبة وحاجات اكبر من كده بكتير بس مش عارفة اعبر .. تسلم ايدك بجد عيشيتنى كل صورة فى الالبوم كأنى كنت تالتكم بجد تسلم ايدك وبتمنى اشوف اسمك قريب جدا جدا واخدة جايزة الدولة وومتقدرة التقدير اللى يليق بيكي

Mina يقول...

يااااااااااااه مش ممكن بجد مش ممكن الروعة والجمال ده تحفة تحفة تحفة بجد
ايه الاحساس والجمال ده بجد مش قادر اقول حاجة مافيش كلام يعبر
نرجو المزييييييييد

غير معرف يقول...

سلام عليكي يا مي

كل صورة بذكري و كل ذكري برغم جمالها بتقتل و صاحبها بعيد ...وجعنتني كلماتك وبكيت..
سلام
مها

هد وء يقول...

بجد تسلم أديكى

حلو جداً

عجبنى جداً أسلوبيك الحلو والبسيط


ربنا يوفئك




: )

Mahmoud البطراوى يقول...

ياااااااااااه فى جمال فى الدنيا كده

انا اول مره اشوف المدونه وبجد حاسس ان فاتنى كتير

الصور كأنى كنت معاكى وانتى بتشوفيها
حاسس ان شفت دموعك وانتى بتوصفيلى كل صوره وانا عمال اتفرج واسألك طب دى بقى اتصورتوها فين؟؟

بجد انا لسه مدخلتش للبروفيل بتاعك عشان اعرف انا كنت بقرا لمين دلوقتى بس مش هستغرب لو طلعت بقرا لشاعر كبيييييييييييير جداااااا

Me , The great rady يقول...

قريتها 3مرات و كل مره بعيش معاها و فجأه القأني وصلت لآخرها

محمد حويحي يقول...

ياااااااااه جميله قوي وكان نفسي اعلق عليها

بس حصل مشكله بسببها مخليه الواحدمتاظ انه شاف حاجه حلوه زي دي تقلب عله المواجع وتبرجل عقلي المهوي

احمد الصمري يقول...

سلامو عليكم يا دكتور ه بي زمتك حد يبقي معاه ناس بيحبوه كدا و يبقي ناقصه حاجه بجد انتى حد مبدع اوىى وحشني كلامك و كتاباتك و يا ربت بجد ترجعي الحاجات القديمه بجد و ربنا يا رب يوفقك في حياتك كلها و يجعل اللي جاي كلو سعاده و فرح وحب على فكره انا بدخل المداونه على طول ربنا يكرمك بجد

احمد المصري

Bent Men ElZman Da !! يقول...

السلام عليكم

اول مره للاسف ادخل عندى
ووصلت للقصيده دى بالصدفه البحته ودى حاجه مبسوطه بيها انى دخلت هنا
احساسك حلو اوووووووووى
"فاكر " حب بدون تخطيط"؟؟
فاكر أحلامنا اللخابيط؟!!
سيرة ذاتك......
خط إيديك......
كل الأوراق والشخابيط؟؟؟
كانت أحلامنا بتتقسم علي قلبين....
وأنا بصرخ وإنت بتسمعني...." الدنيا إتقسمت نصين..
قلبي وقلبك..... فين مينا يوحد قطرين؟؟""
عاجبنى الجزء ده جداااا

تقبلى مرورى :)

حامد برهام يقول...

ماشاء الله .... موهبة واضحة
بس انتي شكلك بتوزني بودنك ...صح؟
بس برده اغلب الوزن كامل مافيش غير حاجة بسيطه خالص
وممكن تكون زحاف كمان انا ماشوفتهاش بالورقة والقلم
بس فعلا احساس جميل وقدرة عالية على استخدام الأدوات
ارفعلك القبعة

منتديات يقول...

طرح متالق بارك الله فيك

Cleaning houses يقول...

رش مبيدات بالرياض
شركة عزل مائي بالرياض شركة عزل خزانات بالرياض شركة نقل اثاث بالرياض شركة عزل فوم بالدمام شركة عزل حراري بالرياض شركة تنظيف بالدمام نقل عفش بالمدينة المنورة