02‏/06‏/2007

عشق سعيد


نفس ملامحه.........؛
نفس الضحكة اللي أنا عاشقها
مابيفرقش كتير عن صورة.......؛
كنت زمان لعنيه رسماها
نفس اللون إللي إتخيلت إنه هيختاره ونفس اللحن
بتبسمله في وسط الزحمة......؛
لكن خايفة تبان في عيوني ملامح حزن
بيبصلها.........؛
وبيهديها رقصة حلمت ارقصها معاه
هو أكيد مش قاصد يجرح.........؛
لازم فاكر إن الماضي خلاص ناسياه
ناسيه العشق وناسية إمبارح
إلا العهد إلللي قطعناه

"إحنا مجرد حلم جميل......."
"إحنا رواية ومابتكملش........"
"هنعيش فيها وهنقبل كل التفاصيل
"
إتمنيت لو أقرب منه وأهمس ليه......؛
"مين قال القصة ماكملتش؟؟"
"حلم بأكتر من كدة إيه؟؟"
"إنت لقيت أرض هتسكنها.......وانا عاشقاك"
"بكرة فاتحلك كل ضلوعه .....حتي إمبارح لسه معاك
"
"
فاكر لما زمان حلفتك تبقي سعيد؟!!؟"
"لو حتي هتبعد عن قلبي..........؛
بس بشرط........؛
إنك تبدا عمر جديد"
وأنا بتخيل صورة لبكرة
وإنت بتوعد إنه أكيد راح يصبح أحلي
وإني اكيد هفضل سكناك
فاكر لما وعدتك إني.......هفضل عاشقه وهستناك
انا والقهوة وحضن كتاب........؛
أول مرة قريته معاك
هستني معادك من تاني
تسرق من وقتك والزحمة........؛
لو حتي دقايق علشاني
وإني أكيد هتجمل وارمي........؛
من أيامي سنين منسية
ضاعت مني....؛
وانا لمعادك مستنية
واجري وأقابلك.......؛
وأتمني أضمك لحناني
بس أخاف تترد لما.......؛
وبشوقي تفاجئك احضاني
بس هنقعد زي ما كنا......؛
نفس الشارع..........نفس مكانّا
نحكي كتير عن عمر مسافر..........؛
واللي إتحقق من أحلامنا
وهتتامل زي العادة..........لون فستاني
وهتتعجب من تفاصيلي ومن ألواني
وهتتأمل نفس الخاتم اللي زمان كان عاجبك عندي
وهتسكت لثواني ونحلف..........؛
إن إنت بتشتاقلي في بعدي
وبإيدي اللي الخاتم فيها...........؛
همسك إيدك
وهقولك:::هفضل علي وعدي
وقت ماتحتاجني هتلقاني
وأسرح تاني
وأما هتسأل ليه سرحانه..........؛
هبكي واقولك.:::
إوعي تكون مش راجع تاني
هتطمني إنك راجع مهما هنبعد
وهنشرب فناجين قهوتنا بعد ماتبرد
وهنحلم بمعادنا الجاي........؛
وهنتعجب من أشواقنا....؛
رغم البعد ولسه بنوعد
وهنتفارق عند رصيف مش راح ينسانا
هنودع وبنفس الكلمة..........؛
اللي أكيد هتعيش جوانا
وأرجع وأستناك م الأول
وأتمني بعادك مايطول
علشان أرجع أشوفك تاني
وأهرب من حزني وأتجمل

.......................
......................
ياااااااااااه
كل ده بتمني أقولهوله وبسرح فيه
وإتمنيت لو أقرب منه وأهمس ليه::؛
"إن طريقي الصعب بدأته..........إن الوعد قدرنا عليه"

....................
...................

إتأملت عنيه في سكوتها.........؛
لكن لعنيها بتتكلم
وأنا بضحك وكأني بقوله:
"إوعي تخاف أنا مش بتألم"
"كمل لوحه عشقك وإرسم"
"إحلم وإوعد.........."
أنا مثلت الدور ببراعه.......؛
بس فاضلّي اّخر مشهد
قبل ما أسيبله ضلوعه وأبعد
لازم بعد سكوتي اتكلم
وأقرب من إيده وأسلم
وألمس عشقي لاّخر مرة
وهحاول وأتخيل بكرة........؛
بكرة صحيح أبعد من غيره.........؛
بس هيرجع..........؛
هو وعدني ببكرة أكيد......؛
بعد ما أسلم..........؛
هطلع برة النور والزحمة وهمشي بعيد
بعد ماهنطق اّخر كلمة
::؛
"بتمنالكم عشق سعيد"

هناك 89 تعليقًا:

سندباد يقول...

صدقيني دبحتيني تفتكري في حد ممكن بيحب الحب ده دلوقتي وان كان في طب ليه محرومين منه ليه بنسمع عنه بس ولما نيجي نقرب منه كاننا كنا في صحرا وشفنا سراب اعذريني مودي وحش معلش
تحياتي

محمد العدوي يقول...

أنت وجعت قلبي .
ما يعني أني اذا مكنتش كرهتك ففي طريقي إلى ذلك ولا عزاء للعشاق ..


..................
..................

وإني أكيد هتجمل وارمي........؛
من أيامي سنين منسية
ضاعت مني....؛
وانا لمعادك مستنية

حلوة قوي سنين منسية وأنا لمعادك مستنية . مش عارف مين الفزلوك اللي كان قال ان الحب يمنح الخلود للوقت .. وهاهو الدليل انه يقتلها . جبتش حاجة من عنندي .. اهو شهادة أهلها .

...................
...................

وغيرها حلو قوي كتير هنــا .
وربنا يوجع قلبك كمان يا بنتي علشان تمتعينا بوجع القلب داعلى طول.


وبطريقة الأخ جبران : والله يحرسك يا مي . يبدو كان تقي جبران واحنا مش عارفين

zordeak يقول...

أولا انا عايز اقولك انى فرحان اوى اوى بالمفاجأة دى

بقى طلعنا رفاق كفاح وكلية واحدة كمان

بجد مفاجأة جميلة جدا


ثانيا بقى

أكتر حاجة بتعجبنى فى شعرك هيا أفكاره

بحس فيها بالجرأة والتجديد اللى مبشوفوش كتيير فى حتة تانية

مجهودك كمان واضح اوى انك بتتعبى وانتى بتكتبيه علشان يطلع مظبوط كده

ملاحظة بقى حاسس ان التحدى فى القصيدة دى قل عن قبل كده

فاكرة بتحداك

مش عارف حاسس بشوية استسلام هناا

سؤال

انتى ليه مبتكتبيش عندنا فى مجلات الكلية ؟

عندك مجلة زمسا بتطلع كل سنة ومستواها كويس اوى انا كتبت فى بتاعة السنة دى والسنة اللى فاتت

مجلات الحائط دلوقتى مبقتش قوية زى زمان لما كنت فى اولى وتانية كنا بنعمل مجلات حائط كويسة جدا

سؤال تانى

انتى مشتركة فى رابطة دهب ؟

النادى الادبى عندنا فى الكلية

لو مشتركة يا ريت تقوليلى لسه شغال وبتعملو لقاءات ولا لأ


ربنا معاكى امتحاناتك خلاص عالابواب


وبجد بجد انا فرحان اوى بالمفاجأة دى

تحياتى

:)

الخيط الرفيع يقول...

مش عرفة أقولك ايه بطلي البتاع دا اللي اسمه الحب
لانك شكلك مش قد عذابة
او عيشي كدا علي طول مكويه بناره
لو في حقيقة بالشكل دا أرفض ان يكون في طرف شديد الحساسية والحب
والتاني مش مقدر بالشكل دا
عارفة لو نحاول نشوف الطرف التاني بيتصرف ازاي وأولوياته اية
هنعرف نتواصل كويس
بس انا عايزة أشرب معاكم قهوة
عشان انا مدمنه قهوة

الاسطى يقول...

الأول أسجل حضورى كواحد من أوائل الى علقوا على البوست دا اللى حاسس إنه ها يبقى جامد فحححححححت ...
قريت أول سطر بس و لسه ما كملتش .. .. خلينى أكمل و أعلق و أقول رأيى
سلام مؤقتا

Rushdy Kamel يقول...

بجد ومن غير مجاملة انا كنت كل يوم بابص على البلوج علشان اشوفك كتبتي حاجة جديدة ولا لأ .لأني متأكد اني هاخش اقرا حاجة جميلة.واللي توقعته لقيته.
كلمات جميلة بجد , رسمتي صورة كبيرة ودراما عشت فيها وحسيت بيها.
اسمحي لي اكون زائر خفيف بس دائم عندك.
لكي اخلص تحياتي

K & T & B يقول...

اسف
مفيش حد بيجب كده دلوفتي
طارق
من شله اخلام الشباب

Unknown يقول...

إيه الروح الرياضية دى يا بنتى اسمحيلى اقولك انت اكيد حاسمة بطولى الدورى بدرى بدرى وإلا كنت طلعتى بزمارة رقبته
ونتفتى شعرها وكام عضة فى اماكن ياي
ههههههههه
بس عندك خامة حلوة أدبياً
شعرك حلو
أصدى قصائدك يعنى
تحياتى

WhItE HeArT يقول...

انا مش هتكلم عن الحب ومش هتكلم عن الكونسبت بتاع اللي كاتباه لإن هوه فوق الوصف لكن طريقتك في السرد حلوه لو تغيري انك بتتوهي الواحد بأفكاره بس واختيارك للكلمات اللي بتتدي لحن في الكلام جميل اوي احييكي على اللي كتبتيه واتمنالك بجد تكتبي حاجة احلى من كده لإن دي احلى حاجة انتي كاتبتيها حتى الان

الاسطى يقول...

عدنا بعدج الفاصل
تصدقى ..؟
و الله قريت القصيدة دى إمبارح كذا مرة بعد ما قلتلك أقرأ الأول و بعدين أعلق .. قريتها كتير و بعدين جيت أعلق .. قلت لأا بلاش النهاردة .. خلينى أعلق لما أقراها تانى بكرة .. يمكن يظهرلى فيها معانى جديدة . و فعلا حصل ..
ما علينا
كبداية .. عايز أقولك " عود محمود " للعامية .. انا بحبها منك أوى .. أفضل لون بحبك تكتبى بيه .. لأنك بجد متفوقة فى العامية جدا و دا مش كلام من عندى لكن غيرى كتير يشهدوا على كده
و كمان عود محمود .. لروائع العامية .. الظاهر إنك فى فترة الإمتحانات بتنشطى .. على عكس المفترض
بعدين عايز أقولك إن التجربة اللى انتى بتمرى - أو مريتى - بيها تجربة جميلة ...كفاية جدا إنها طلعتلنا شاعرة من العيار التقيل - أوى - قادرة توصل كل كلمة لكل قلب ..
مش عارف ليه يا مى من يوم ما ابتديت أقرالك و انا باحس فى كلامك بطعم خاص .. ريحة حلوة اوى .. ريحة الحب .. بقيت باميز كلامك و أسلوبك عن أى كلام تانى بسهولة ..
كفاية رغى بقى و خلينا نتكلم فى المفيد ...
-----------------
كل مرة يا ست مى بتبهرينى الصراحة فى بدايتك فى أول سطر .. شديتينى جدا من أول كلمة
---------------
عجبتنى أوى
"نفس اللون إللي إتخيلت إنه هيختاره ونفس اللحن"
ببساطة .. علشان لخصتى فى جملة صغيرة أوى إنك قريبة منه جدااااا .. و كلمة اللحن دى بالذات حبيتها أوى هنا .. مش أى حد ممكن يفكر فى الكلمة دى .
----------------------------
"بكرة فاتحلك كل ضلوعه .....حتي إمبارح لسه معاك"
يخرب بيت شيطانك .. و يخرب بيت إبداعك .. جديد جديد جديييييد من هنا لبكرة الصبح .. و كمان حلو و معناه واسع وواضح
---------------
وإني أكيد هتجمل وارمي........؛
من أيامي سنين منسية
ضاعت مني....؛
وانا لمعادك مستنية
وعد من ضمن الوعود .. بس مش زى باقى الوعود ..
يعنى تفضلى مستنياه طول السنين دى كلها .. ووقت ما يرجع .. تنسى السنين دى كلها لمجرد إنه رجع وطيب خاطرك .. مش مهم رجع إمتى .. المهم إنه رجع ..
بالذمة فى حد بيحب كده ..؟
---------
بس أخاف تترد لما.......؛
وبشوقي تفاجئك احضاني
فلتت منك شوية فى السطر التانى دا ..
ممكن تكون " بالشوق هاتقابلك أحضانى "
بس فكرتها واصلالى جدا .. و عاجبانى أوى
------------

نفس الشارع..........نفس مكانّا
نحكي كتير عن عمر مسافر..........؛
واللي إتحقق من أحلامنا
وهتتامل زي العادة..........لون فستاني
وهتتعجب من تفاصيلي ومن ألواني
وهتتأمل نفس الخاتم اللي زمان كان عاجبك عندي
وهتسكت لثواني ونحلف..........؛
إن إنت بتشتاقلي في بعدي
وبإيدي اللي الخاتم فيها...........؛
همسك إيدك
وهقولك:::هفضل علي وعدي
وقت ماتحتاجني هتلقاني
وأسرح تاني
وأما هتسأل ليه سرحانه..........؛
هبكي واقولك.:::
إوعي تكون مش راجع تاني
هتطمني إنك راجع مهما هنبعد
وهنشرب فناجين قهوتنا بعد ماتبرد
وهنحلم بمعادنا الجاي........؛
وهنتعجب من أشواقنا....؛
رغم البعد ولسه بنوعد
وهنتفارق عند رصيف مش راح ينسانا
هنودع وبنفس الكلمة..........؛
اللي أكيد هتعيش جوانا
وأرجع وأستناك م الأول
وأتمني بعادك مايطول
علشان أرجع أشوفك تاني
وأهرب من حزني وأتجمل
.......................
الجزء دا بقى كله على بعضه كده شغل جواهرجى .. و مش أى جواهرجى كمان .. صدقينى ممكن نعتبرها قصيدة جوا قصيدة .. المشهد جميل أوى يا مى و الله مافيش أجمل من كده حوار و انفعالات و ردود .. و إحساس
-------------------
وألمس عشقي لاّخر مرة

نيجى بقى على القنبلة ..
و الله العظيم شوية و كانت عينيا ها تدمع و انا باقرى السطر دا
و قريته دونا عن القصيدة كلها فوق الميت مرة ..
و باردده دلوقتى كتير و انا ماشى و أقول إيه الفكرة الرهيبة دى ..؟ إيه المشاعر دى ..؟ إيه الإحساس دا ..؟
السطر دا بالذات عايزله بلوج كامل أتكلم فيه عنه و مش هاخلص .. السطر دا بالذات هافضل فاكره طول عمرى كأفضل بيت شعر عامى قريته فى حياتى
رومانسى أوى ..
أوى ..
أقولك إيه يا شيخة .. فكرتينى فى نفس الوقت بكل الحاجات الحلوة و الحاجات الوحشة اللى مرت فى حياتى
-----------
"بتمنالكم عشق سعيد"
هارد لك .. و حظ سعيد فى حب جديد ..
-----------
قصيدة عايزة قصيدة علشان أعلق عليها .. و ياريتنى عرفت أديها حقها ..
أعذرينى .. ممكن يكون أطول كومنت فى تاريخ البلوجاوية ... بس و الله ماحسيت إنى كتبت كلللل دا ..
أصل القصيدة دى انا حسيت بيها أوى ...
و باللى كاتباها ..
ربنا معاكى يابنتى فى التجربة اللى عشتيها دى
و تخليكى تبدعى كده دايما يارب
و باتمنالك انا كمان عشق - جديد - سعيد
تحياتى
أحمد حمزة

غير معرف يقول...

مش عارف الصراحة اقول ايه!!!!ا
انتى رجعتى تانى لشعر العامية
عود مبارك
تخيلتك و انتى بتدندنى بكلمات القصيدة أثناء تظبيطها
انا على فكرة غنيتها و انا بقراها
ملقتش فيها اى حجارة مكلكعة
كان الطريق كله مرصوف و مستوى و كله ورود كمان
القصيدة ديه بقى هتتحط فى احسن اعمال شعرية قريتها فى حياتى و تانى احسن عمل انتى كتبتيه ضفته لقائمة اجمل ما قرأت بعد ألبوم صور
بجد يا مى انتى لو بطلتى تكتبى شعر عامى مش هسامحك ابدا
و كمان هتخنق منك جدا لو محاولتيش تعافرى عشان تطلعى بموهبتك لمصر كلها بعيد عن التدوين
...................
أنا فخور بيكى جدااااا

•«ρяoιd»•™ يقول...

اخيراً عوده للعاميه

بجد بجد ابدعتي

و اسلوبك و كلماتك بيخلوا اي حد يتشد و يعيش الحاله اللي انتي رسمتيها ببراعه

و اسمحيلي ارتجل بعض كليماتي المتواضعه كعادتي

لسه بحلم ايوه بيك
لسه شوقي بيناديك
بتمني تاني المس ايديك
و عنيا تغرق بين عينيك

لملمت كل الذكريات
و سكنت احضان السكات
لسه بتذكر و بحلم
يصحي بنا حلم فات

ناسيه انك حتي بُعدي نسيت
عايشه حلم فيا وحدي و اتماديت
حلم حبي .. بس في الآخر صحيت
افتكرت اني خلاص .. انتهيت

بس لسه قادره اعيش عمر الجديد
و يوم زفافك هتلاقيني جايه ليك .. و من بعيد
ايدي تلمس حضن ايدك و في عيوني اشوف عنيك
هتلاقيني بقول لقلبك كل عشق عليك سعيد

اتمني اكون قدرت اعبّر عن احساسك صح

و يا رب ارتجالي المره دي يعجبك

تحياتي

رينـــــــــــا يقول...

دايما اجى عندك
وامشى وانا حاسه ان كل كلمه لمستنى
بتوصفنى

بجد بحب كلماتك
ووصفك لمشاعرى :D:D:D
تسلم ايديكى

feeling يقول...

مش لاقيه كلام اعبر عن اعجابى
انا لقيت دموعى نازله
كلامك بيدخل الاقلب بدون مقدمات
شكرآعلى زيارتك لمدونتى المتواضعه

غير معرف يقول...

يااااااااااااااه يا مى
اولا اسلوبك مفيش عليه تعليق..ليس عليه غبار زى مابيقولوا :)انا مع عاشور انك لازم تخرجى بكتاباتك بره التدوين لانك فعلا تستاهلى
الموضوع بقى مش قادرة اقولك... في فعلا الحب ده دلوقتى

إتأملت عنيه في سكوتها.........؛
لكن لعنيها بتتكلم
وأنا بضحك وكأني بقوله:
"إوعي تخاف أنا مش بتألم"
"كمل لوحه عشقك وإرسم"
"إحلم وإوعد.........."
أنا مثلت الدور ببراعه.......؛
بس فاضلّي اّخر مشهد
قبل ما أسيبله ضلوعه وأبعد
لازم بعد سكوتي اتكلم
وأقرب من إيده وأسلم
وألمس عشقي لاّخر مرة
وهحاول وأتخيل بكرة........؛
بكرة صحيح أبعد من غيره.........؛
بس هيرجع..........؛
هو وعدني ببكرة أكيد......؛
بعد ما أسلم..........؛
هطلع برة النور والزحمة وهمشي بعيد
بعد ماهنطق اّخر كلمة::؛
"بتمنالكم عشق سعيد

بجد حسيت احساس خلى دموعى تملى عنيا
بحييييييييييكى جداااااااا
سلامى ليكى وبدعيلك بالتوفيق
:)))

vetrinary يقول...

ادبيا قليتى عن القصيده اللى فاتت
اكيد عشان اللى فاتت كانت قصيرة فقدرتى انك تمسكيها كويس
اسلوبك بقى رائع
وعرفتى تعملى قاموس لنفسك
مع وجود بعض الالفاظ النزاريه اللى بتضغى على النص
اسف
المرادى القصيده مليانه كسرات فى الوزن
بس عشان كتير اوى
مش هينفع
انى اقلهملك
عايزيين مجهود

اما بخصوص الموضوع
فهو اتكتب كتييييييير اوى من الناحيه التانيه
مقرتش لواحده ست كتبت فى الموضوع ده
بس عامه باين انك عملتى مجهود وحطيتى بصمتك على الموضوع

vetrinary يقول...

صديقه دربى الحالم
لك اقسم
سابقى دائما ابدا
يدا ممدوده بالحب
اذانا
اذا ما شئتى ان تحكى
ومنديلا اذا ما شئتى ان تبكى
فلا تخشى اذا ما احتجتى للشكوى
ونادينى
ساتيكى والقاكى
واحمل عنكى الحزن

yasmina يقول...

قصيدتك جميلة
كلام حلو
الحب بالشكل اللي انت واصفاه صارت في ناس تسميه استسلام والله ما انا عارفة هو فين الصح من الغلط بالنسبة للحب

لكن اهم شي لما الواحد يحب يكون اللي بيحبه يستاهل وقتها كلامك كله حيكون صحيح

تحياتي

bastokka طهقانة يقول...

اية الحلاااااااااوة دي

فنانة


اوروفوار

يا مراكبي يقول...

ده بفرض إنه بيعشقها فعلا .. مش بيهرب من الماضي وخلاص

جايز مايكونش عشق سعيد ولا حاجة .. ويكون بيتألم وهو بيمثل إنه .. سعيد

تحياتي

Haitham Abu Akrab يقول...

مع اني عارف انك كاتباها من جوه قوي
الا اني كالعاده هقولك
....
.
.
.
مين قال القصة ماكملتش؟؟
.
.
لحد هنا واحساها خلص والباقي
!!!!

أحمد الشمسي يقول...

برافو عليكي، جميل وموزون ومتظبط بالمسطرة!
فيه سطر واحد هو موزون لكنه من بحر شعري مختلف، لكن ده ما يمنعش انها حاجة اقرب الى الكمال!
معلش انا متأخر كالعادة

-_- يقول...

جميل اوي كمية المشاعر دي


--------

مدونتى فيها موضوع ريحته وحشة
اللى بيقرف ميدخلش عندي

:)))))))

Van Gogh يقول...

اتعرفين ما هو جمال المدونات..؟؟

انها مكان لشعراء ربما لا يسعفهم الحاضر لنشر كلامتهم..فوجدوا هنا نافذة ليقولوا للعالم نحن هنا...اصحاب موهبة

انتى منهم..هذا اكيد

ولكن الاجمل من موهبتك...هى ان كلامتك نابعة من تجربة شخصية...فتتجاوز هنا حدود الشعر...وحدود الموهبة

لتجعل من يقرأها يتألم معكى
ينتظر معكى
ويتوه معكى

اخر ما اريد قوله...حاولى ان تقلبى هذه الصفحة من حياتك..رغم انى لم استطع ان اقلب صفحتى

:)

أخف دم يقول...

القصيدة جميلة كالعادة ..
لى ملحوظتان وانت عارفة انى باحب أقول ملحوظات عشان يبقى فيه الأحسن ان شاءالله
العامية تحديدا بتشد الشاعر قوى لبساطتها وسهولتها .. عشان كده ممكن تلاقيكى بتكتبى قصيدة خمس ست صفحات وانتى مش حاسة .. عشان كده باقوللك حاولى تكثفى القصيدة شوية والغى كلام كتير وتفاصيل ممكن تتلغى .. زى الذكريات القديمة مثلا ممكن يتلغى منها كتير ..
وما زلت باقوللك العامية أحسن .. وانا عارف ان القصيدة بتطلع من القلب من غير قصد سواء العامية أو الفصحى بس أنا اقصد عشان انت شاعرة موهوبة جدا .. فانا متوقع ان هييجى عليك فترة قريبة ولازم تتخصصى فى مجال عشان تكملى فيه عشان ماتهدري شطاقتك بس .. عشان أنا متفائل بموهبتك جدا ..
الملحوظة التانية .. بما إن البلوج بتاعك بلوج كله مشاعر وحب وقصايد يبقى مالهاش لزمة الأغنية اللى انت عاملاها فى البلوج .. خللى كلامك يوصل الناس لوحده من غير شوشرة حتى لو كانت موسيقى .. عشان كلامك احسن من الموسيقى

قصاقيص يقول...

sendbad
::::::::::::::::
ياااااااه......دبحتك؟؟
أسفه لو كانت أحاسيس القصيدة من العيار التقيل كده....مكنتش اقصد اجرح حد بيها
.................
ليه لأ.........يمكن فيه حد لسه بيحب كده
بس مش كلنا مكتوب لنا نصادف الحب اللي من النوع ده.....ويمكن اللي صادفناه اصلا مكنش حب....يعني ممكن تكون الغلطة غلطتنا.......مش غلطة الحب نفسة
.................
سلامة مودك....انشالله خير
............
تحياتي ونروتني

قصاقيص يقول...

محمد العدوي
::::::::::::::::
طيب وفي طريك لكده ليه.....ماخير البر _قصدي الكره_عاجلة
علي بركة الله
...............
الفزلوك اللي انت بتقول عليه ده اكيد كان قصده ان الحب بيمنح الخلود للوقت عن طريق الذكريات مش الوقت نفسه....ولو مكنش فيه خلود مكنتش قدرت تستني في سنين منسيه من غير زكريات لحد ماتشوفه تاني....انت بس اللي اكيد فهمت غلط
...................
حلوة الدعوه دي....يارب من بقك لباب السما
انا وانت...قادر ياكريم
...............................
الله يكرمك انت والاخ جبران
.............
خد بالك من موضوع الكره اياه.......بيقولولك من البلوج للبلوج_قصدي م القلب للقلب_رسول
ولا ايه؟؟
..............
نورتني

قصاقيص يقول...

zordeak
::::::::::
ولا نقول: د/ أحمد فؤاد
..............
أكيد المفاجاه كانت اجمل بالنسبالي يازميلي العزيز
...............
ميرسي علي رأيك في القصيدة.......دايما ارائك بتشجعني
معاك ان فيه فرق بين روح القصيدة دي وبين روح اتحداك.......بس انا لما كتبت القصيدة دي كنت بكتبها بفكرة تانيه غير فكرة اتحداك في ان البطل اختار بطله جديدة واتخلي عن الحب القديم.........انا هنا كنت قاصدة اوضح ان البطلة من البدايه كانت عارفه ان مش هي اللي هتنزل عليها ستارة النهاية للروايه دي........يعني ده كان حب مع اعتراف انه رغم روعته بس مش هيكمل وهما قابلين ده......وحلم ببكرة وهما مش بعيد ولا اعداء.......بس رغم كده هي ماقدرتش تكون صادقه من جواه في تنفيذ وعدها فمثلت مشهد النهاية مش أدته بتلقائية
حاولت اوضح الفكرة الأساسية في الجزء ده من القصيدة:؛
إلا العهد إلللي قطعناه
"إحنا مجرد حلم جميل......."
"إحنا رواية ومابتكملش........"
"هنعيش فيها وهنقبل كل التفاصيل"
.................
وبعد كده وعد بانها هتفضل تحبه
وبعد كده بتبان كدبتها علي نفسها في البيت ده؛
أنا مثلت الدور ببراعه.......؛
بس فاضلّي اّخر مشهد
..................
دي كانت فكرة القصيدة اللي قصدتها وانا بكتب بس اكيد ماقدرتش ابلورها في الكتابه بشكل اوضح بدليك ان محدش اخد باله من ده واعتبروها مثاليه من البطله وتنازل وتضحيه ..ما اخدوش بالهم ان المشهد مناصفه بين البطل والبطلة......؛
طبع يظهر الفكرة كانت غامضة في القصيدة
بس المصيبه انهم قالوا زمان"المعني في بطن الشاعر"؛
معلش رغيت كتير وطولت عليك
..................
موضوع النشر في الكليه يازميلي العزيز فانا نشرت في مجلة المجد ومجله الفردوس ومرتين في العلياء
لكن للاسف مش مشتركة في رابطة دهب الادبيه لانها والله اعلم مش اكتيف حاليا
بس سيدي ياسيدي كنت بتنشر في زمسا اهوه........ناس واصله بقي...........اصلي مش بنزل الجامعه كتير والحاجات دي لازمها تواجد ومتابعه انت عارف
.................
المهم اني فرحانه بجد بكوني طلعت زميله ليك في كليه واحدة
ويارب دايما كدة منور مدونتي وبتزود جمالها بزياراتك الرقيقه
.................
تحياتي

قصاقيص يقول...

الخيط الرفيع
:::::::::::::::::
حرام عليكي بقي بعد سنين منسيه وانتظار يوم ما اقبله ونشرب قهوة سوا حد يشاركنا الدقايق دي
عديها المرة دي عشان خاطري واوعدك ليكي عندي القهوة اللي تحبيها اي وقت تاني
اما عشقك وادمانك للقهوة دول حاجه تانيه ومادام كده....خلاص انضمي لجمعيه عشاق القهوة ودي طبعا بيتزعم قيادتها العزيز "أحمد سلامة" تقدري تقدمي ليه اوراق التحاقك في الجمعيه وهو ينظر فيها
ربنا يخليك لينا يازعيم
...................
ياريت تقري ردي علي
zordeak
يمكن يقربلك اكتر فكرة القصيدة اللي انا فشلت في اني اوضحها كفايه
وهستني منك تعليقك بعد ماتقريه وتقري القصيدة تانيه
بيتهيألي هيكون تعليق مختلف
لان تعليقك ده رقيق وجميل لكن ظلم البطل اوي من حيث تحليله للموقف الدرامي للقصيدة
.................
منوراني برقتك ايتها العضوة الجديدة في الجمعيه
..............
تحياتي

قصاقيص يقول...

الاسطى
::::::::::::::::
وأنا في إنتظار كومنتك
سلام مؤقتا

قصاقيص يقول...

Big Code
:::::::::::::::
يشرفني طبعا تكون زائر دائم
وميرسي علي كلامك الجميل ده دايما
يارب دايما منورني بزيارتك وكومنتاتك الجميله دي
تحياتي

قصاقيص يقول...

K & T & B
::::::::::::::::
اهلا بيك وبشله شباب الأحلام ياطارق
..........................
متأكد ؟؟؟
انا بميل أكتر اننا مانعممش قاعده ونسيب الموضوع متروك للتجارب ووجهات النظر
ولا ايه؟

قصاقيص يقول...

أبو أمل
::::::::::::::
ههههههههههههه
ده علي إعتبار اني عضوة في جمعيه الماة المتوحشه
...............
ميرسي اوي علي رأيك الجميل في شعري..........اقصد قصايدي يعني
................
نورتني

قصاقيص يقول...

WhItE HeArT
::::::::::::::::::
ميرسي علي الزيارة الحلوة والكومنت الجميل والامنيه الرقيقة دي
................
تحياتي

قصاقيص يقول...

الاسطى
:::::::::::::
كل ده فاصل.....ياراجل؟؟
ده انا افتكرتك نسيت
ماعلينا........؛

بس أخاف تترد لما.......؛
وبشوقي تفاجئك احضاني
....كويس ان فكرتها وصلاك ومع طبعا احترامي لاقتراحك في التغيير فهي عجباني كده اوي من لحظة ماكتبتها....مش بس علشان انا اللي كاتباها.لأ..علشان حاسه فيها تجديد لغوي مش مكتوبة بالشكل المألوف الجاف........شايفه ان معناها بصيغتها دي اقوي وموسيقي اكتر
.................
بس برضه ميرسي علي اقتراحك وعلي تعليقك الجميل ده دايما اللي بجد بيحرجني بذوقه
......................
اخجلتم تواضعنا يا عم أحمد...كل ده كلام حلو في حق القصيدة وأحساسها........ده كلام جميل انا مش قده
ومعلش لو كنت قلبت عليك اللي فات
...............

ميرسي يا احمد بجد......صحيح ده اطول كومنت جه لمدونتي من يوم ما بدأت تدوين بس بجد هيفضل كومنت اعتز بيه علي طول لان رايك الجميل وكلامك المشجع اللي فيه فرحني
وبجد انت اديست القصيدة حقها زيادة
وميرسي علي امنيتك الرقيقه دي
.....................
يارب دايما منورني
تحياتي ليك

قصاقيص يقول...

أحمد مختار عاشور
::::::::::::::::::::::
تانى احسن عمل انتى كتبتيه ضفته لقائمة اجمل ما قرأت بعد ألبوم صور
.....علي فكرة انا كنت مستنيه الجمله دي منك انت بالذات ولو ماكنتش كتبتها في كومنتك كنت فعلا هتدايق اوي
............................
بجد متشكرة لتشجيعك ليا دايما واحلامك الحلوة بمستقبلي في الشعر اللي يارب ما اخونهاش
....................
منورني وبجد تعليقك علي القصيدة دي بالذات كان مهم بالنسبالي فعلا
.................
تحياتي

قصاقيص يقول...

•«ρяoιd»•™
::::::::::::::::::::
روميو المختفي اخيرا ظهر
...............
ميرسي يارامي علي متابعتك وعلي تعليقك الجميل وارتجالك اللذيذ ده
.................
نورتني

قصاقيص يقول...

رينـــــــــــا
:::::::::::::::::
تسلمي وتسلم تعليقاتك ياست الكل
دايما منوراني كده يارب
ويارب دايما كتاباتي تعجبك وتحسيها
...............
تحياتي ليكي ياقمر

قصاقيص يقول...

feeling
::::::::::::::::::
شرفتيني
وميرسي ليكي انتي علي زيارتك الجميله وتعليقك الرقيق
وسعيدة ان القصيدة عجبتك وحسيتيها
...............
تحياتي

قصاقيص يقول...

shayma
...................
بجد ميرسي علي الزيارة الجميله دي
وعلي التفاؤل ليا ده اللي بتشاركي "عاشور"فيه
وميرسي علي كومنت ك الرقيق ده
...................
نورتيني بجد
تحياتي ليكي

قصاقيص يقول...

vetrinary
:::::::::::::::::::
هو انا ماقلتلكش قبل كده انك بارع اوي في انك ترسم في تعليقك جو لجنه تحكيم في مسابقه عالمية
بجد عندك مهارة غريبه في انتقاء الفاظ واسلوب نقد _سوري_ مكلكع الي حد ما
او بلاش نقول مكلكع خلينا نقول " متكلف".......؛
....................
طيب معلش هرخم عليك : انت كتبت كومنتين يعني ماكنتش هتيجي علي الدقايق اللي هتكتب فيها الكسرات الكتير اوي في الوزن اللي قلت عليها.....يعني كتبت كومنتين واحد للقصيدة وواحد كده من عندك _كادون يعني_ مجتش بقي علي انك تكتبلي كومنت تحليلي ناقد لكسرات الوزن واقتراحتك بالنسبه ليها
بلاش كسل بقي
.............................

بس عامه باين انك عملتى مجهود وحطيتى بصمتك على الموضوع
ههههههههههههه
الجمله دي فكرتني ببابا لما كان بيطبطب عليا يوم نتيجتي في الثانوية العامه وانا بعيط علشان قليت 1.3 في ال 100وبيقوللي معلش ياحبيبتي انتي عملتي اللي عليكي
هههههه
مكنتش اعرف ان القصيده من كتر ما فيها كسرت بقت حالتها ميأوس منها اوي كده وتستحق بعض الطبطبة
....................
نورتني
وفي أنتظار تعليقك اللي طلبته منك

قصاقيص يقول...

yasmina
::::::::::::::::::
لكن اهم شي لما الواحد يحب يكون اللي بيحبه يستاهل
بالظبببببببببببببببط
هو ده فعلا بيت القصيد
المهم التضحيه علشان مين
..............
نورتيني
وتعليقك فرحني اوي
................
تحياتي

قصاقيص يقول...

bastokka طهقانةد
::::::::::::::::::
ايه الزيارة الجميله دي
منوراني
.
.
اوروفوار ورحمة الله وبركاته
..............
سلامووووووووووووز

MaMaDo يقول...

الواحد بيجى البلوج دى وبيحس انه حمار
ايه الناس النضيفه دى

بجد كلامك حلو اوى
مش لاقى كلام اقوله
يعبر عنه

بجد حلوه

قصاقيص يقول...

يا مراكبي
::::::::::::::::::::::
ميرسي اوي علي متابعتك وعلي كومنتك ياباشمهندي
بجد بتنورني
............................
ممكن بس طلب صغنون ردا علي تعليقك الجميل ده؟؟
تقري ردي علي كومنت
zordeak
وهستني منك ياريت تعليق بعدها علي رايك في فكرة القصيدة
...............
تحياتي

قصاقيص يقول...

هيثم ابوعقرب
::::::::::::::
وتاعب نفسك وجاي وكومنت وبتاع
وفي الاخر كومنت من كلمتين والباقي نقط
.
.
.
يابخللك ياصديقي
..............
علي العموم
شكرا

قصاقيص يقول...

أحمد الشمسي
::::::::::::::::::::
المهم انك نورتنا وفاكرنا يادكتور
والحمدلله ان القصيده عجبتك
بس ممكن طلب؟
ممكن تعرفني بجد فين البيت اللي انت قاصده ده
بجد رايك يهمني
.................
منورني مهما كنت متأخر

قصاقيص يقول...

Sharm
:::::::::::::::::::
ميرسي علي الزيارة والتعليق
.
.
اوعدك مش هدخل
ههههههههههههه
نورتني

قصاقيص يقول...

Van Gogh
:::::::::::::::::
ميرسي علي الكلام الجميل ده
بجد كلام يشجع جدا
.
.
واتمني اني دايما اكون عند حسن ظنك الادبي والابداعي
.............
وميرسي علي النصيحه
واتمني ان اي حد عنده صفحه محتاج يقلبها يقدر يقلبها
................
نورتني

قصاقيص يقول...

أخف دم
::::::::::::::::
هاي يا اشرف.فينك ....وفين زياراتك؟
.....................
بالنسبه لملحوظاتك بقي:؛
الملحوة الأولي:انا علي فكرة لما بكتب بكتب باحساس فضفضه عن حاجه جوايا......وكويس انك فاهم ده وقلته في تعليقك.......علشان كده بعد مابكتب لابفكر اشيل ولا اكثف ولا الغي........فكرة مونتاج القصيدة مش بتخطر في بالي خااااااالص
عشان انا حاساها كيان عاطفي واحد........اكيد انت كشاعر موهوب فاهم ده
..................
الملحوظة التانيه: شوشرة؟؟
حرام عليك
بقي
love story
شوشره
انا بموت في الاغنيه دي
يعني تقدر تقول ليها عندي طايع خاص..ومع ذلك ممكن اي حد مش بيفضل يسمعها مع القرايه يعملها
pause
...................
بس بجد ميرسي علي كلامك الجميل عن القصيدة وجمال موسيقاها

شهاده اعتز بيها من شاعر جميل موهوب زيك
.................
يارب دايما منورني
شرفتني

قصاقيص يقول...

MaMaDo
::::::::::::::::
ياشيخ حرام عليك
انت بس اللي مجامل زيادة عن اللزوم
.......................
منورني
............
تحياتي ليك

Mr_Tea يقول...

الشاعرة العزيزة مى
بعد التحية
أولاً...أنا آسف على التأخير فى الرد بس أنا كنت مستنى أعرف رأى الناس فى عودتك للعامية
و أعتقد انك عرفتى دلوقتى انى كان عندى حق فى طلبى
----------------------------
ثانياً...مش فاكر
----------------------------
ثالثاً...الموضوع هو هو الموضوع إياه
----------------------------
رابعاً...ربنا يوفقك عشان انتى فعلاً موهوبة
----------------------------
ملحوظة...فى موضوع لسة ماتحسبناش عليه وانتى عرفاه كويس بس مش هينفع هنا قدام الناس

تحياتى

غير معرف يقول...

السلام عليكم


مي


انتي انسانة بجد هايلة بمعني الكلمة واحسسسسسسسسساسك مش موجود منه



انا في قرايتي للقصيدة دي
ماحستش خالص بالطول

وكنت اقول كمان
وفي كلام في النص من جماله

اقراه بصوت هادي
وكلام اقراه بعنيا بس
وكلام اعلي صوتي فيه


انا مش عارفة اقولك ايه



بجد تسلمي




شوفي عندنا انا وانتي امتحان بكرة وبرغم كده ما قدررررررررتش ما اعلقش واقوك


انتي انسانة رائعة
واقولها قدام العالم كله


واحده من الناس اللي صعب يكونوا موجودين دلوأتي من ناحية احساسك وموهبتك وكله كله


ما شاء الله عليكي




دا كلام عن الاحساس في القصيدة









اما بأه لباقي الكلام استني عليا لبعد الامتحان

انتي عارفة الظروووووف
اهيء اهيء


سلام
وربنا يوفقنا جميعا يارب

Nour/Nour

Eric Matt يقول...



ما شاء الله

اه فيه يا سندباد

وجعتي قلب الناس ليه يا قصاقيص؟

عموما ربنا كريم

وهي دار شقاء :(

تحياتي لك من ماناساس البلد

Haitham Abu Akrab يقول...

.
.
.
.
.
.
.
.
.
.
.
.
.
.
.
.
.
أحسن

heba labeb يقول...

مى بجد القصيدة دى تحفة اوى
وانا اول مرة اقرالك حاجة عامية
بس بجد عجبتنى اوى
بس فى حب كدة دلوقتى؟؟
مش عارفة لو انا مكان بطلة القصيدة كنت هبىق كدة ولا لا
بس بجد فيها مشاعر واحساسيس حلوة اوى
تحياتى ليكى يا جميلة

Reemo يقول...

حلو أوى يا مى
بجد مش عارفه أعلق وأقول اى حاجه
غير انى لو فى حب كده فى الدنيا
أكيد كان حال الدنيا اتغير كتير
انتى فعلا موهوبه يا قمر
كلماتك واحساسك رائع
تحياتى لابداعك

hoda omran يقول...

القصيدة بجد بجد تحفة
وتقوليلى انك فاشلة ومش قادرة تغيرى
حرام عليكى يابنتى
انتى خسارة فى البلد دى
..............
بس تصدقى يامى الفكرة تضايق اوى
وتوجع اوى
وتصدقى كمان نفسى اتكلم معاكى ووحشانى
:)

vision يقول...

يويا الجميله انى بمشى اتمنزر بيها انها بنوت هوتكتب شعر بالجمال ده....وحشتينى مدونتك لكن معلش زنقة امتحاناتك وهاجى وازور كل حبايبى الى مقصره فى حقهم......لكن غيابى بيجى بفايده باجى الااقى انتاج غزير وجميل جميل اوى يا مى ربنا يحميكى لينا وتتشهرى كده بالخير وفى يوم اقول دنا كنت بعلق للبنوته دى فالمدونه بتاعتها ...تحفه بجد ومش قادر احدد انهو اكتر حته عجبتنى لأن كلها مترتبه ومترصصه على بعضها سورى رغيت سلاام يا كوكا

Rosa يقول...

يا يا مي
هوا في كدا؟؟
الاحاسيس العاليه دايما
القلب الي بينبض بالحب حتى في اقصى اللحظات قسوة
قسوة انه يشوف حبيبه بيستأنف حياته مع حب جديد
مش قادره اقول اي حاجه
غير دائما رائعه يا مي

أحمد سلامــة يقول...

يعني الواحدمش عارف يا جماعة انتو ايه حكايتكوم مع البنت دي
كل شوية بيت مكسور وبيت مقطوم
المهم الموسيقى توصل احنا ناسيين ان مي في طب بشري مش معهد اللغة
----------------------------------
مـي يـا مـي
اسمحيلي اقول ان كان ليا الشرف اني اقراها اول واحد ومش عارف انتي ركنتيها طول المدة دي ليه
انا قلت انتي مستخسراها في المدونة وبصراحة حقك
اعترفلك باعتراف بقى
اكتر شعر بيستهويني هو شعر الحكايات
اللي هو تحسي كده ان القصيدة في أولها :
صلوا عالنبي يا جماعة ، كان في مرة زمان .....
فاهماني
يبقى الواحد بيقرا حدوتة
وفي نفس الوقت مغناة
جمـال على جمـال
-----------------------
طبعا موضوع القصيدة نفسة ماليش دعوة بيه غير اني اقراة لاني بقرا قصيدة شعرية مش سيرة ذاتية يعني معرفش اتكلم معاكي في ليه وعشان اية والكلام ده كلة
وكفاية بقى احنا مواراناش غيرك
ارحمينا الناس عندها امتحانات

كراكيب عادل يقول...

لا كدة خليني اقرا كويس وبعدين اعلق

سنعود

:)

منة الله يقول...

قصاقيص


ادعوك للمشاركة في استطلاع راي

اكثر 10 مدونات تاثيرا في قرائها

و احب ان اخبرك ان مدونتك تم ترشيحها فعلا

اليك الرابط

http://www.6ef.blogspot.com/

قصاقيص يقول...

Mr_Tea
:::::::::::::::::
العزيز :احمد اسامة
........................
أولاً:أنا اللي اّسفه علي تأخيري في تنفيذ طلبك ومتشكرة أوي علي سبوت الضوء اللي إنت سلطته علي كتاباتي في العامية..اشكرك بجد
.....................
ثانياً:ولا أنا
......................
ثالثاً:مش بالظبط...في تغيير شوية بس انت يومها مش إديتني فرصه أشرحلك
........................
رابعاً:أيوة كده الله يسترك.....مش لازم نتناقش وتطلعني شاعرة فاشله قدام الناس
ههههههههههههه
.........................
نورتني

قصاقيص يقول...

Nour/Nour
..................
وحشتيني مووووت ياضياء
الحمدلله عدي الامتحان ده علي خير....عقبال الباقي
انا إطمنت عليكي من نهال
.............................
ميرسي ياصديقتي الجميله علي متابعتك الجميله حتي في ايام الزنقه دي
بجد كومنتاتك الجميله دي بتشجعني اوي
وميرسي علي الدعايه الجميله اللي عملاهالي في الكليه....بقيت اشهر من عم علي بتاع المشرحه
..................
تعليق في رقته مايقلش عن رقتك اللي اتعودت عليها
...................
تحياتي ليكي ياقمر

قصاقيص يقول...

The Groom
::::::::::::::::
ميرسي علي متابعتك
ومعلش غاوية وجع قلب من يومي
......................
عجبتني اوي جمله"وهي دار شقاء"........حسستني ان القصيدة غم اوي
وانك جاي تعزي مش تعلق
عموما عزا ولا تعليق ....متشكرة اوي علي المتابعه الجميله دي
....................
تحياتي ليك ولكل ماناساس البلد

قصاقيص يقول...

هيثم ابوعقرب
:::::::::::::::::::
.
.
.
.
.
.
.
.
.
شكرا
من يومك مجامل

قصاقيص يقول...

heba labeb
:::::::::::::::
هوبا الرقيقة
ميرسي علي زيارتك الجميله دي
.......................
وانا بجد سعيدة ان القصيدة عجبتك
ومتسشكرة علي رايك الجميل ده
ويارب دايما منوراني كده
وانشاء الله ماتكونش اخر مرة تقريلي عاميه
......................
تحياتي ليكي

قصاقيص يقول...

REEMOO
::::::::::::::
تحياتي ليكي انتي ياقمر علي تعليقك اللذيذ ده
طبعا كالعادة منوراني ومشجعاني
................
ميرسي لمتابعتك ورقتك
........................
تحياتي

قصاقيص يقول...

همسات
::::::::::::::::::
وحشتيني ياهدي ياصاحبة الهمسات الجميله
......................
فرحانة والله ان القصيدة عجباكي كده
ومعلش لو كان احساسها او فكرتها يوجعوا
سلامتك ياقمر
.................
انا نفسي احكي معاكي اكترررررررررررر
ويارب تكون الامتحانات تمام
................
باي باي ياجميل

قصاقيص يقول...

camera_girl
:::::::::::::::
يااااااه علي الرقه
ايه التعليق الجميل ده.....معقول انا استاهل كل ده
ربنا يخليكي
.............
دعواتك
................
المهم بقي زحمة الإمتحانات دي تعدي علي خير وترجعيلنا بنتيجه بيرفكت
وتنورينا علي طول من جديد
.................
ولاطولتي ولاحاجه ياقمر............انتي منوراني
............
تحياتي

قصاقيص يقول...

Rosa
:::::::::::::::
اشكرك علي الزيارة الرقيقه والتعليق الارق
بجد منوراني دايما
وتعليقاتك المرهفه بتزود جمال بوستاتي المتواضعه
..............
تحياتي
ومنوراني

قصاقيص يقول...

شريف
::::::::::::::::
هاي ياشريف.....ازيك
انا تمام الحمدلله
................
ميرسي ياشريف علي رايك الجميل في القصيدة دهوعلي رقتك كمان في وصف المدونة انت وكل اللي وصفوها بالرقه دي
....................
اكيد طبعا يشرفني اني اكون متابعه دايما لمدونتك الجميله....بس اعذرني انا عارفه اني مقصرة
بس ظروف الامتحانات وزنقتها بقي.......معلش
ادعيلي اخلص وانا هزهقك زيارات
نورتني
وميرسي لرقتك

قصاقيص يقول...

أحمد سلامة
:::::::::::::::::::
في إنتظاري الطويل لتعليقك ظننت أنني في إنتظار من هم لايأتون أبداً
....................
العزيز سلامة:؛
طبعا مش محتاجه اشكرك علي كونك أخدت القصيدة بإعتبارها كيان مبني علي الموسيقي في المقام الاول......لان درايتك في مجال الشعر مش بالشئ العادي وانا نفسي بحسد نفسي اني كتير بستفيد منها
.......................
اسمحلي انا اللي اقول اني كان ليا الشرف انك اول حد قريها وانها والحمدلله من القصايد القليله اللي طلبت رأيك فيها وجه بالراي المشجع..علي الاقل ماكنش فيها صدع خلاك تنهرني علي طريقه المحترفين_امثالك_ في نصيحه الهواة أمثالي
...................
وانا يشرفني اني كتبت قصيدة عاميه من النوع اللي بيستهويك
ده اكيد هيزود القصيدة جمال من نوع خاص
.....................
وكفاية بقى احنا مواراناش غيرك
ارحمينا الناس عندها امتحانات
.
.
مكنش العشم ياصاحبي
..........................
نورتني جدا ومتشكرة علي تعليقك اللي كنت منتظراه ده
واتمني لو اننا نتقدم ولو سلمة في قايمة اهتماماتك وتيجي تزورنا بدري شوية المرة الجايه.....ده ان كان فيه مرة تانيه ومكنتش اخدت بنصيحتك وركنت حبه علشان الناس اللي وراها امتحانات
.................
تحياتـــــــــــــــــي

قصاقيص يقول...

كراكيب عادل
:::::::::::::::::::
وانا مستنيه طبعا
.
.
.
.................
تحياتي

قصاقيص يقول...

منة الله
:::::::::::::ك
ميرسي علي الزيارة الجميله
والدعوه البناءة دي
وعلي اللينك اللي يسعدني اوي اني استخدمه واشارك طبعا في استطلاع الراي الرقيق ده
................
ميرسي ليكي
وشرفتيني

عبسميع يقول...

حلوة أوي يا مي
فيها حالة رهيبة تحفة بجد
إيه يابنتي الحلاوة دي مكنتش اعرف انك بتكتبي في العامي حلو اوي كده

من الواضح ان المنصورة ولادة يعني انتِ وأشرف وانا طبعاً (مفيش وش مغرور هنا)يالا ربنا يستر علي البلد دي مننا

تحياتي لكِ ولقلمك
محمد

غير معرف يقول...

السلام عليكم




صديقتي الجميلة
الحمد لله فعلا الامتحان كان بسيط واشكرك انك سألتي عليا


كمان ياست الك عندي تعليق صغير علي كلامك

دعايا ايه يا مي

دا علي اساس انك متاجه يعني للدعايا بتاعتي

يبقي انتي ماتعرفيش انتي مين يابنتي في شعرك وكلاكمك الرائع بجد ليكي تأثير كبير جدا في اي حاجه بتكتبيها بصمتك بتكون واضحة فيها اووووووووووووي


المهم يا ستي علشان ماحدش يقول مجاملات والكلام دا





اعلقلك بأه علي قصيدتك اللي والله قريتها اكتر من مرة
وتجنن

ما شاااااااااء الله اللم لا حسد


بدايتك خرافة
ونهايتك رائعة
واحساسيك متمكنة منها اوي اوي بأنك تقدري توصليها بتعبرات خيالية جميلة






نفس ملامحه.........؛
نفس الضحكة اللي أنا عاشقها
مابيفرقش كتير عن صورة.......؛
كنت زمان لعنيه رسماها
نفس اللون إللي إتخيلت إنه هيختاره ونفس اللحن
بتبسمله في وسط الزحمة......؛
لكن خايفة تبان في عيوني ملامح حزن
بيبصلها.........؛
وبيهديها رقصة حلمت ارقصها معاه
هو أكيد مش قاصد يجرح.........؛
لازم فاكر إن الماضي خلاص ناسياه
ناسيه العشق وناسية إمبارح
إلا العهد إلللي قطعناه


دي البداية اللي فيها كم كبير جدا من الخيال والحب الدافيء الجميل ووضحت كمان فيها قد ايه قسوة الحد دا
يعني بمقدار حبك بمقدار قسوته ( مثلا يعني )













اما النهاية اللي كلها تضحية وبرده كلها مشاعر دافئة منك واخلاص زايد عند الحد وكمان كبرياء جميل منك



إتأملت عنيه في سكوتها.........؛
لكن لعنيها بتتكلم
وأنا بضحك وكأني بقوله:
"إوعي تخاف أنا مش بتألم"
"كمل لوحه عشقك وإرسم"
"إحلم وإوعد.........."
أنا مثلت الدور ببراعه.......؛
بس فاضلّي اّخر مشهد
قبل ما أسيبله ضلوعه وأبعد
لازم بعد سكوتي اتكلم
وأقرب من إيده وأسلم
وألمس عشقي لاّخر مرة
وهحاول وأتخيل بكرة........؛
بكرة صحيح أبعد من غيره.........؛
بس هيرجع..........؛
هو وعدني ببكرة أكيد......؛
بعد ما أسلم..........؛
هطلع برة النور والزحمة وهمشي بعيد
بعد ماهنطق اّخر كلمة::؛
"بتمنالكم عشق سعيد





يابنتي تسسسسسسسسسسلمي
اقصد يا استاذتي

وفي انتظار ديوان قصاقيص مشاعر




بس من فضلك النسخة بتاعتي هدية منك ليااااااااا

والدعايا خليها عليا

هاااااااااا



سلام
ودعوااااااااااتك
دا احنا غلابة ذي بعض
Nour /Nour

غير معرف يقول...

فنانتي الجميلة

معلش طولت

بس اعمل ايه
نسيت اقولك
وعلي الملأأأأأأأأأأأأأأأأ

مفيش حد يسهل ربع المشاعر اللي انتي موضحاها دي
























الا











الا





اذا كان يستاهلها فعلا

واللي يستاهلها طبعا هو صاحب النصب
ودا طبعا يبقي من بخته

يابخته






أما الحد اللي انتي وصفتيه دا
رغم كل الحنان اللي ظاهر بين سطورك


ما افتكرش انه يستاهل مننا لحظة ندم
او دمعة واحده



لسبب واحد
لأنه من البداية مش من نصينا










اتمني كلامي يكون واضح
يلا خمسة فلسفة








سلام
Nour/Nour
برده انا

يا مراكبي يقول...

فعلا المعنى مالقطناهوش زي ما إنتي قصدتي في تعليقك على أحمد فؤاد

لكن برضه في الحالة دي العشق مش ممكن يكون سعيد أبدا

تحياتي

قصاقيص يقول...

يا مراكبي
.............
ميرسي لمتابعتك اوي يابشمهندس
بس تعرف ممكن يكون سعيد امتي.....لو هي كانت البطلة من البدايه وانا كنت الدوبلير بس قمت بدور الدوبلير حلو اوي بس في النهايه الافيش بصورتها وإسمها ونجاح الروايه ليها لان ده حقها.....والبطل مهما المشهد حكم عليه بحب الدوبليرة او حتي حبها بجد فأكيد هو وهي معترفين إن الدور مش ليها ولا البطوله حقها
بيتهيألي كده اكيد عشق سعيد
ولا ايه؟!!ظ
..............
تحياتي
وميرسي ليك يابشمهندس

قصاقيص يقول...

Nour/Nour
::::::::::::::
مش بقولك مظبطان ياقمر ومصيطاني وسط المدونين
بجد ياضيا مش عارفه اشكرك ازاي علي المتابعه الجميله دي اللي يوم عن يوم بتشجعني اكتر
وميرسي علي ال_خمسة فلسفه _دول
وردي عليهم ياحبيبتي لما نتقابل اكيد
المناقشة تطووووووول
بس بجد بجد
ميرسي ليكي ياضيا
............
تحياتي

محض روح يقول...

بحبك ياصحبتي
جدااااااااااااااا
والبوست ده خضني
الحاله ديه عندي ليها كام يوم
كنت بسمع انغام وافتكرتك

حتى لما حطيت الاغنيه افتكرتك
كلام ده حسيته طالع منك انتي مش منها

مش كل الناس ممكن يسمحو اووي زيك

انتي فهماني
معلش حسه الكلام ملخبط حبتين
الساعه 3
وبقالي يومين مانمتش


وحشتني موت
خلصي بقى يابنتي

خلي بالك من مذكرتك
وخالي بالك منك اووى

اشوفك على خير ان شاء الله

تحياتي ياجميل

غير معرف يقول...

من ساعت ما قريتيهالي و أنا معجبة بيها جدا
عظمة على عظمة يا بنت

نهى جمال يقول...

إتأملت عنيه في سكوتها.........؛
لكن لعنيها بتتكلم
وأنا بضحك وكأني بقوله:
"إوعي تخاف أنا مش بتألم"
"كمل لوحه عشقك وإرسم"
"إحلم وإوعد.........."
أنا مثلت الدور ببراعه.......؛
بس فاضلّي اّخر مشهد
قبل ما أسيبله ضلوعه وأبعد
لازم بعد سكوتي اتكلم
وأقرب من إيده وأسلم
وألمس عشقي لاّخر مرة
وهحاول وأتخيل بكرة........؛
بكرة صحيح أبعد من غيره.........؛
بس هيرجع..........؛
هو وعدني ببكرة أكيد......؛
بعد ما أسلم..........؛
هطلع برة النور والزحمة وهمشي بعيد
بعد ماهنطق اّخر كلمة::؛
"بتمنالكم عشق سعيد


----

اليوم بالنسبالي موجع لوحده

وماكنتش هرد

لكن مقطعك الآخير ده

أجبرني أحييكي رغم الآلم

تقديري وشكري

مها يقول...

القصيدة جميلة جداً وكان بإمكانك اختصارها مع تكثيف الأحساس فى بعض الجمل
لكنى لا أصادر على تلقائية تعبيرك
ربنا يوفقك دايماً

Maha
http://mashrabeya.blogspot.com/

aya mohamed يقول...

بحب جدا كلامك
وصدقك فى كل حرف بتكتبيه
ومع ان مش فى جديد بس بحب ادخل اقرى القديم كل فترة
وحشتينا :)

L.G. يقول...

آية جبتني هنا عن طريق حملة إحياء عالم التدوين على الفيس https://www.facebook.com/events/221604994588943/
ياريت تشاركينا
بالنسبة للتدوينة ديه .. تفتكري فيه حد يستاهل الحب ده ؟ وليه هو يتمتع بحب اتنين وهي تتألم ؟ مش في الآخر فضل حد تاني وحب حد تاني في رأيي القلب ميساعش اتنين
خسارة فيه حتى الشعر الجميل ده
تحياتي

L.G. يقول...

لمتابعة التعليقات :)