05‏/05‏/2007

إيمــــــانــي



لا لسـت بعيداً عـن قلبي

.... فعبيـرك يـملأ أحضـاني

يا أجمل قدرٍ في دربي

.... يا حلماً بدّل أزماني

يا عشقاً يأسر دقاتي

.... ما أحني ضلوعك سجاني

يامن بعيونك خارطتي

.... وشذي انفاسك اوطاني

عــلمني بمدارك أفنـى

..... بجميع فنون الدوران

بجميع أساليب العشق

.... علمني مهارة أحزاني

وأعدّلي _من قبلك_ نبضاً

.... أفناه الشوق وحرماني

ماكـان من الدهر لديّ

.... قد مر بكفيك ثواني

ما أحوج قلبي ياعمري

.... بهواك إلي عمرٍ ثاني

فأنا في حبك عابدةُ

..... لا شئ يغير إيمـاني

هناك 84 تعليقًا:

أحمد سلامــة يقول...

مبدأيا
منك لله
احبطيني
كل ما افتكر اني ليا في الشعر ولا حاجه
تيجي ببوست كده وتقوليلي
مكانك
انت فاكر نفسك بتعرف تكتب شعر
انت كل علاقتك بالشعر هي انك تقرالي
وتسقف
وانا شاطر
وبسمع الكلام
اعمل ايه ، مش بمزاجي
مظطر عشان حقاني
ربنا يخليلك قلمك يا مي
بجد ممتعه

أحمد سلامــة يقول...

طبعا انا ماتكلمتش جوة القصيده بـ ولا كلمة
لانها مش محتاجة
هي بتتكلم كفاية عن نفسها
يالا بقي كفاياني رغي

غير معرف يقول...

قلتى::::

عــلمني بمدارك أفنـى
..... بجميع فنون الدوران

بجميع أساليب العشق
.... علمني مهارة أحزاني
************************


وقلت :::

علمنى حبك ان القهر لة عدة اسماء
ان الموت ياتى كل مساء
وان احساسك العالى غاليتى
لة اجنحة سوداء

******************************

رائعة كلماتك مى
شاعرتنا القديرة
احسست ان الدنيا لازلت بخير
وان الحب باقى
ما اجمله من ايمان نحتاجة جميعا

لكن حقا هل يوجد الان من يعشق الى هذه الدرجة

من يذوب فى محبوبة حتى البكاء


وشكرااا على كلماتك الى تنقلنى الى عالم اخر

وسلااااااامى

MaMaDo يقول...

الله..بجد حلو او ى الكلام ده
....
ايه يا عم هو انت كل مره تيجى تقول حلو اوى الكلام ده طب ما احنا عرفين
..
اصلى بصرحه مش بفهم فى الشعر بس بحسه اوى و بيعجبنى عشان كده بدخل اعمل كومنت عليه
...
لا يا عم غير كلام انت مش شايف الناس كله عمله ازاى
...
عندك حق
....
احم احم

بصرحه يا مى القصيده و حشه
و الوزن بايظ و ايه الى انت كتباه ده

حلو كده
اه كده بيقى اسمك عملت حاجه

يلا بقى عشان نمشى
سلااااااااااام

Eric Matt يقول...


ما شاء الله

رغم اني مش مركز اوي وانا بقرأها وأعتذر بشدة عن هذا

ربنا يحميكي لينا و يخليلنا قلمك و عقلك دولا ويحفظك يا رب

تحياتي لك من ماناساس البلد

رينـــــــــــا يقول...

على فكرة انتى خليتنى مش عارفه اقول ايه
كلامك فوق اى تعبير حلو :D

ادام قلمك

FrEe.PhArAoH يقول...

ما شاء الله

انا بقيت احس ان كلمة جميل تقليدية اوى ..غير كدا حاسس انها بقت قليلة عليكى كمان

بجد انا مليش ف الشعر بس بحس بيه حلو ولا لأ .. حاولى توصلى الكلام دا للنور .. اكيد الناس عندها حق تقرا الكلام دا وتستمتع بيه

تحياتى

SomeOne يقول...

طب انا طلعت ندل ومش باجي ازور مدونتك

طب وانت
؟؟؟
عموما القصيدة جميلة
بس ليست برائعة
بمعني

يا حلماً

يأسر دقاتي

بعيونك خارطتي

تشبيهات جميلة بس مكررة

بس عجبني قوي
وشذي انفاسك اوطاني
:)

يا مراكبي يقول...

مش هأتكلم عن مستوى القصيدة والصور الجمالية اللي فيها .. كالعادة رائعة .. مش متوقع غير كده من قبل ما أقرأ

لكن المهم هو المعنى اللي في آخر بيت .. ممكن يتفهم غلط من المنظور الديني .. ياريت كنتي عبرتي عن المعنى اللي جواكي بألفاظ بعيدة عن العبودية والإيمان

محمد العدوي يقول...

والله أنا مررت من هنا كثيرا . وقرأت قصائد عديدة كلها ابتسم في آخرها وأقول : ايه القدرة دي . مش القدرة الشعرية فأنا معرفش كتير في الشعر لكن القدرة النسوية البادية بإلحاح تحمل معها شيئا من غرور نسوي ومكر نسوي وصدق نسوي أيضا .هنا في إيماني وفي سواها ولعلها في أتحداك ومن علم تقول أنا انا واضحة ..


عموما بصفتي كفرت بكثير من الشعر فقد جددت هنا بعض إيماني .

وكل الود .

الاسطى يقول...

باسجل حضورى ..
و هاسجل توقيعى حالا لما أكمل قراية
بس علشان شوفت بوست جديد قلت ألحقلى مكان فى الطابور
مش صح كده ؟

الاسطى يقول...

انا جيت تانى
و قريت
بس إيه ..
الكلام اللى هاقوله أكيد معروف قبل ما اقوله
حلو .. جميل .. ممتاز ... رائع
بس الحالة جديدة
تقريبا خرجنا من حالة جرح الفراق .. لحالة نشوة اللقاء
و الفرق كبير .. وواضح
أجمل بداية لأى شعر كتبتيه قبل كده ..
و كانك سألتى نفسك سؤال و بتجاوبى عليه بالقصيدة دى
فى مجملها جديدة عليكى ... بالنسبة للحالة و التجربة
من أولها لأخرها - كالعادة - صور عميقة أوى و معبرة أوى أوى .. عجبنى منها :
فعبيـرك يـملأ أحضـاني


وشذي انفاسك اوطاني

يا حلماً بدّل أزماني

-------------
صحيح يا مى .. هو فيه حب بالطريقة دى لحد دلوقتى ..؟
بتيتهيألى الحب اللى بالشكل دا إنقرض من زمان ..
الحب للحب .. مش لأى حاجة تانية
أتمنالك كل الخير .. و كل الحب
يسلم قلمك ..
و تسلمى
تحياتى

عبسميع يقول...

كل اللي اقدر اقوله روحي يابنتي
وتعالي بسرعة

بجد بجد عجبتني اوي وحسيتها اوي

ما شاء الله عليكِ الإحساس بيوصلني ودي احلي حاجة في شعرك يابنتي انا مكنتش بقرا شعر الفصحي ودلوقتي بقراه
تحياتي

محمد

hoda omran يقول...

يالا مع انى زعلانة بس هعلق
.................
كالعادة متألقة وحساسة ورقيقة
عاجبنى اوى الموسيقى والوزن فى القصيدة دى
........
بس حاساها فيها شبه من حاجات عندك يعنى هى حلوة اوى بس حاسة الاسلوب واحد
.
.
.
.
:)بس بردو زعلانة

•«ρяoιd»•™ يقول...

كعادتك يا قصاقيص

مبدعه دوماً

و اقوي احاسيس ترسميها بأروع كلمات

ربنا يحفظك يا رب

و اسمحيلي اضيف جزء من كلماتي المتواضعه التي سوف اضعها في مدونتي المتواضعه

علي صفحات عينيكِ ..
كتبت الشعر اغنيه ..
علي صفحات عينيكِ ..
محوت خطوط سنواتي .
نسيت جميع ما اكتب ..
و لا اذكر سوي عينيكِ ..
و بعضاً من قراءاتي .
جعلتك قبله تقصد ..
و نوراً .. صعب أن يرصد ..
و ما اكتبه في عينيكِ ..
اصبح كل عاداتي .

تحياتي

الأرمـوطــي يقول...

رائع يا مى جميلة جداً كالعادة بس ليا نقض صغير وده علشان انتى ليكى معزة خاصة فى قلبى ياريت تستقبلية بصدر رحب من انسان يهمة مصلحتك بلاش ذكر الايمان والتعبد مع غير الله انا عارف انه مش قصدك لكن برضه خلى بالك متوقعيش نفسك فى زنوب
مع السلامة

كراكيب عادل يقول...

ما أحوج قلبي ياعمري
.... بهواك إلي عمرٍ ثاني

البيت دة عجبني

بس الي بعدة لا

بصراحة انتي موهوبة وكانك بتجمعي خيوط

وتنسجي منها رداء جميل

Van Gogh يقول...

مش عارف اقول ايه
فجأة كده والواحد بيدور من مدونة للتانيه..وبيسأل نفسه هوا بيدور على ايه..؟؟
يلاقى المدونة بتعاتك فى وشه

كم من المشاعر والأبداع يحتاج ايام عشان استمتع بيه..مرة..واتنين...وتلاتة...وميه

عرفت دلوقتى انا كنت بدور على ايه

على مبدعة جميلة زيك
انسانة رقيقة..وكلماتها ارق منها
على صديقة جديدة يشرفنى انى اتواجد كل فترة عشان استمتع بكتابتها

استمتعت بمدونتك كلها
جبتها من الاول للأخر

واحجز لنفسى مكاناً وسط الاف المعجبين

yasmina يقول...

شعر حلو جدا
عجبتني كلماتك البسيطة والسلسة

هذه الجملة اكثر شيء عجبتني
ما أحوج قلبي ياعمري
.... بهواك إلي عمرٍ ثاني

لانك مع الحبيب لا تريد ان ينتهي العمر وتريد ان يستمر الى الابد

Dr.SEA يقول...

It's WONDERFUL :)

LOJAIN يقول...

كلمتك روعة و عجبتنى جدا جدا
اول مرة ازورك واستمتعت قوى بالشعر الرقيق ده

مستنيه منك اكتر و اجمل و احسن طبعا
Regards:
Lojain :)

إبـراهيم ... يقول...

إنتي فييييييييين يا دكتووورة ؟؟؟

.
.
.
مش عاوز أقول لك حلو ، وجميل ، ورائع :) عند رأيي ـ لا أزال ـ وعندك هنا كام كسـرة زي ( بجميع أساليب العشق علمني مهارة أحزاني ) !!

إبـراهيم ... يقول...

آآآه ، وقطعًا كان نفسنا نشوووفوووكي ...لا سيما إننا مش بننزل المنصورة كل يوم !!


إنما عملوا الموبايلات لكي يُـرد عليها :) ..........

تحياتي أحين :)

حصان بري يقول...

عــلمني بمدارك أفنـي
..... بجميع فنون الدوران

ما أحوج قلبي ياعمري
.... بهواك إلي عمرٍ ثاني

تاني بضاعه اشوفها
كلمات بسيطه
اشطار قصيره
محمله بمعاني حلوه بجد
النون المكسوره نفس قافيه البوست اللي فات
ونفس الرومانسيه الجميله مغرقاه
روعه بجد
بسجل اسمي في المعترفين بمولد شاعره
ابقي افتكرينا بس بعدين

bastokka طهقانة يقول...

الله الله
ده انك ملاك من يومك بجد
هايلة يا ميوسة

Eman Eltaher يقول...

كلماتك جميلة أوى و شكلك موهوبة ربنا ينمى موهبتك أكتر و أكتر و نقرالك قصايد أحلى و أحلى

بجد مدونتك جميلة بمشاعرها و أحاسيسها و كلماتها اللى فوق الروعة

أنا برضه بكتب شعر أو كنت فاكرة انى بكتب شعر معقول بس اتضحلى انى لسه دون المستوى !!! أحبطتينى بالعربى

بس عموما اهو نتعلم برضه اصول الشعر و ان شاء الله بعد ما أسجل حاجاتى تبقى تقريلى شعر ف مدونتى


بحييكى على الكلمات الحلوة و القصيدة الجميلة اللى فوق الروعة

و مستنية زيارتك

البتاع يقول...

حلوة موت ياقصوصة

شبه اشعار نزار
انا قريت كمان كام بوست تانيين

انا بحب اوى نوع الشعر ده
وانتى اسلوبك حلو جداا
حقيقى دعينى احييكى
وزى مابقول دايما انا بنحنى احتراما لكل اللى بيطوع الكلمة لخدمة احساسه

مدونة عسولة بجد
تحياتى

قصاقيص يقول...

سلامة
ـــــــــ
ما أتحرمش منك ومن دعواتك عليا يارب
بجد بتفرق معايا
وبطل تواضع بقي إحنا متفقين علي ال 100
سنة ضؤية الفرق بيني وبينك وإني عمري ماهوصلك
بطل بس ترفع من روحي المعنوية

:::::::::::
طبعاً حقاني عشان كده بتحرجني بذوقك
ويخليلي تعليقاتك الجميله
::::::::::::::
رغي غيه اللي بتقول عليه....المدونة مدونتك ومنورها طبعا
::::::::::::::
ملحوظة: ميرسي علي مجهودك في خروج القصيدة بالشكل اللي عجب الناس ده وبالإحساس ده وميرسي علي صورة البوست بجد هايله
ميرسي ليك يا أحمد
:::::::::::::::
أبطل رغي انا بقي؟!!!!؟

قصاقيص يقول...

فارس
ـــــ
قلت انت فاخجلت كلماتي
بيتهألي انا انسحب بالبوست يتاعي احسنلي ......لا وجه لمنافسة شاعر متمكن زيك
:::::::::::::::
منورني
:::::::::::::::
وصدقني أكيد _مش ممكن_ اللي بيحب بالطريقه دي موجود.....أنا حتي مش بحب أكتب عن خيالات..........واقع صدقني
يمكن نادر........بس موجود
يمكن حلم...........بس مش مستحيل
::::::::::::::::
تحياتي ليك إنت
ويارب دايما منورني كده
وميرسي علي متابعتك الرقيقة اللي بتشجعني

قصاقيص يقول...

MaMaDo
ـــــــــ
هههههههههههه
هي دي الكومنتات ولا بلاش
::::::::::::
الله لو قلت ايه حتي..........برضه منورني وبفرح بزيارتك وتعليقك
يارب دايما تشرفني بكلامك ابو دم خفيف
تحياتي
سلام

قصاقيص يقول...

The Groom
ـــــــــــــ
ولا إتذار ولاحاجه
كفايه عليا اوي انك تنور المدونة بزيارتك وكلمتين حلوين كده منك
هبقي طماعه ولا ايه
::::::::::::
يارب دايما كتاباتي تقدر توصل وتعجبك
تحياتي

قصاقيص يقول...

رينـــــــــــا
ــــــــــــــــ
أشكرك بشدة
دايما كلامك بيحرجني وبيخجل تواضعي
ميرسي اوي اوي علي الكلام الجميل ده
منوراني اوي
تحياتي

قصاقيص يقول...

FrEe.PhArAoH
ـــــــــــــــ
من كومنتك لباب السما
::::::::::::::::::
المهم انك تفضل منورني كده علي طول
وكلامي يعجبك علي طول
ويارب ايما مشجعني بكومنتاتك الحلوة دي يابلدياتي
منورني

قصاقيص يقول...

شادي فايد
ـــــــــــــ
حمدالله ع السلامة
تسمع عن قانون إسمه ..."قانون المثل"؟؟!!؟؟
::::::::::::::::::::
عموما الكومنت ناقد
بس ليس بناجح ولا بناء
بمعني

يا حلماً

يأسر دقاتي

بعيونك خارطتي

تشبيهات جميلة لأنها مشاعر
والمشاعر مكررة
ولا ياتري انا اللي مش واخدة بالي إن المشاعر بقت ببصمة الصوت

بس بجد عجبني اوي إنك مابقيتش زي ما طلعت ورجعت تزور مدونتي
::::::::::::::::::::::
صحيح ياشادي: إنت بتحب تقرا في إيه ؟ ولمين ؟ واّخر مرة قريت كان إمتي؟؟
بتقرا في فنون الشعر؟؟
أصلي بجد مفيش مصروف كفايه ومحتاجة لو مكتبتك فيها تسلفني....خايفه أصدي وأكون مكررة
:::::::::::::::::
تحياتي

قصاقيص يقول...

يا مراكبي
ـــــــــــــــ
منورني كالعادة ياباشمهندس أحمد
::::::::::::::
ميرسي علي رأيك في قلمي وفي القصيدة كعمل أدبي
موضوع الفهم من المنظور الديني أنا ناقشته تقريبا قبل كده وأتمني إن حضرتك تكون كنت متابع ردي علي كومنت حضرتك اللي اكيد طبعا بينورني ومناقشتي معاك بتضيف لرصيد إعتزازي بمتابعه حضرتك
صدقني الموضوع ملهوش أي أبعاد دينيه.......... وبيتهيألي إني لو هقول علي التشبيه ده حرام أو شرك فمن الأحري اني مكتبش شعر غزل صريح كده.........يعني بمبدأ حرام هتكون النتيجه اللي هنوصل ليها هي"مابني علي باطل.....فهو باطل"..........أما من حيث إننا بنحترم الدين طبعا اللي لاشك اني مش الانسانه الكاملة في الجانب ده فهعتبر غبداعي الادبي بعيد جدا في رموزه وتشبيهاته عن أي مدلول ديني
أنا نفسي مش بحاول أتطرق للجزئية دي خالص........لاني لو تطرقت اكيد هتكون معركتي خسرانه
:::::::::::::::
معلش طولت عليك في ردي
بس بجد ببقي سعيدة بالمناقشه مع شخصية زي حضرتك اوي
ويارب دايما منورني ومهتم بإنك تبدي رأيك اللي اكيد بيهمني اوي
تحياتي ليك

قصاقيص يقول...

محمد العدوي
ــــــــــــ
بصراحه دباجه التعليق الجميل ده فاقت ببراعه دباجه البوست المتواضع بتاعي
الزيارة دي فعلا نورتني اوي
والتعليق فرحني جدا جدا
::::::::::::::
القدرة النسوية البادية بإلحاح تحمل معها شيئا من غرور نسوي ومكر نسوي وصدق نسوي أيضا

التركيبة دي عبقرية أوي وعجبتني اوي
:::::::::::::
ميرسي ليك ايها الحيادي
::::::::::::::::::
يارب دايما منورني ويارب إيمانك اللي إسترديته ببعض الشعر يوصل لمرحلة الثبات
::::::::::::::::
نورتني اوي
وشكرا مرة تانيه

قصاقيص يقول...

الاسطى
ــــــــــــ
ميرسي ليك يا احمد
دايما بتحرجني بتعليقاتك الجميله
والحمدلله إن مفيش نقد في كومنتك علي القصيدة دي
يظهر اني بدأت أتحسن في الشعر.......ولا أيه؟؟!!؟
"والله مستوي طبيخك إتقدم ياحورية"
ههههههههههههههه
::::::::::::::::::::
عموما يا احمد:صدقني كل شئ موجود
لامستحيل تحت الشمس
:::::::::::::::::
نورتني وتسلملي تعليقاتك

قصاقيص يقول...

الديليكون
ــــــــــــــ
يعني ما اتأخرش؟؟
أقطع نفسي أنا
ده غيه الغلب ده
ههههههههههههههه
:::::::::::::::
الحمدلله إنك بقيت تقرا الفصحي علشان تقرا للعظماء واسمع وقتها رأيك الناقد في قصائد الهواة اللي زيي كده
:::::::::::::
يارب دايما منورني

قصاقيص يقول...

همسات
ـــــــــــ
حبيبه قلبي......ربنا مايجيب زعل ياقمر
في ايه طيب؟!!؟
::::::::::
الأسلوب ممكن يكون واحد لن الكاتب واحد وكتب بإحساس واحد في حقبة واحده

ئغيه كميه ال "واحد" اللي انا قلتها دي
اما رغاية بشكل
أعوذ بالله
معلش أكلت ودنك
::::::::::::::::::
حبيبتي أنما مش أقدر أزعلك ابداً والله
بس ياتري الجميل زعلان ليه بس وأنا تحت امره
::::::::::::
منوراني ياحبوبة

قصاقيص يقول...

•«ρяoιd»•™
::::::::::::
روميوووووووو
كده هنخسر بعض
يتقطع عليا بشعرك الجميل مش كده
طيب سيبني اتمنظر علي روحي شوية بقصيدة عاجبة الناس
خليك بس فاكر حركاتك دي
:::::::::::::::
بجد القصقوصة دي اللي انت رديت بيها المرة دي ليها طابع خاص غير كل اللي قريته ليك قبل كده كمان
بجد رقيقه اوي اوي وحساسة وهادية وإيقاعها جميل وناعم
تحياتي ياعم رامي
:::::::::::::::
شفت...........خليتني انا اللي سبتلك كومنت علي كومنتك .....قصدي قصيدتك
خليك فاكر دي كمان
::::::::::::::
سلام وخصام

قصاقيص يقول...

الأرمـوطــي
:::::::::::::::
أسعدني تعليقك أوي وإهتمامك ومعزتي الخاصة عندك
وأسعدني اكتر إنك فاهم إني مش قصدي أي مدلول ديني من خلال ألفاظي
:::::::::::::::
ميرسي علي إهتمامك ونصيحتك
::::::::::::::
ويارب دايما منورني كده

قصاقيص يقول...

كراكيب عادل
::::::::::::::
شرف كبير ليا إن كلمه في البوست تعجبك...مش بيت بحاله
ده انا كده بقي أتفرد براحتي
بيت بحاله عجبك..........ده انا بقي عديت في الشعر وأنا مش واخد بالي
::::::::::::::::::
أتمني ان البيت اللي مش عجبك يكون مش عجبك بسبب مفهوم معين وصلك مش بسبب إنه كبناء أدبي بناء غير ناجح
:::::::::::::::::
تحياتي
ويارب دايما منورني بمتابعتك الجميلة وتعليقاتك الاجمل
سلام

قصاقيص يقول...

Van Gogh
:::::::::::
أنا اللي يشرفني متابعتك من وقت للتاني
بجد فرحتني اوي زيارتك دي وتعليقك الرقيق الجميل ده
ميرسي علي تشجيعك بكلامك اللذيذ ده
وطبعا مكانك في القلب

:::::::::::::::
أتمني إني أفضل كده عند حسن ظنك وتفضل متابعني ومشرفني
::::::::::::
نورتني

قصاقيص يقول...

yasmina
:::::::::::::::
الله
إحساسك الرقيق العالي خلاكي تعجبي بأكتر بيت حبيته وأنا بكتب
بجد رقيقة وزيارة رقيقة وتعليق ارق
نورتيني ويارب دايما منوراني
::::::::::::
هو دايما الياسمين رقيق وساحر كده؟؟
ليه بس يابابا مش سميتني
yasmina
:::::::::::::::::
تحياتي

قصاقيص يقول...

Dr.SEA
ـــــــــــ
thanks alot
:::::::::::
so nice to have such anice comment from you
::::::::::::;
thanks again
bye

قصاقيص يقول...

LOJAIN
ـــــــــــ
يارب دايما اكون استاهل كلامك الجميل ده
وبجد زيارتك كانت مفاجاة لذيذة ليا اوي
نورتيني وميرسي علي رقتك
تحياتي

قصاقيص يقول...

إبـراهيم ... معـايــا
ــــــــــــــــــــــــــــ
ناقص كمان كسرتين وشوية كشكشة وتطلع القصيدة فستان سوارية تحفه
ههههههههههههه
ـــــــــــــــــ
والله انا كان نفسي أشوفك أكتر
لاسيما اني هبدا إمتحانات
إنما الموبايلات اتعملت علشان نتداول نمرها اولا ثم نرد عليها
ــــــــــــــــ
منورني دايما وبتحرجني
ههههههههههه
سلام

قصاقيص يقول...

حصان بري
ـــــــــــــ
ملاحظة جميلة إنك أخدت بالك من تشابه القافيه هنا مع البوست اللي فات
تحياتي ليك بجد
ـــــــــــــــــ
ربنا يخلي كلامك الجميل ده
وعموما:لاداعي للقلق......هبقي اسيبلك مواعيد في السيكرتاريه
ههههههههههههه
بلد بتاعه شهادات صحيح
نورتني بجد
تحياتي

قصاقيص يقول...

bastokka طهقانة
ــــــــــــــــــــــــ
هههههههههههه
أخدتي بالك من الجناحين
ههههههههههههه
ـــــــــــــــ
نورتيني جدا جدا ياصاحبة الدم الخفيف
ـــــــــــــــــ
سلامووووووووووووز

قصاقيص يقول...

Eman Eltaher
ــــــــــــــ
زيارة جميلة من إنسانه أجمل ومن مدونة رقيقه فعلا
شرفتيني أوي وبجد سعيدة بانك اديتيني الفرصه اني اعرف مدوناتك الرقيقه
:::::::::::::::
إحم إحم..........أخلتم تواضعنا
ياعزيزتي كلنا هواة
:::::::::::::::
يارب دايما منوراني ويشرفني اوي زيارة مدونتك الرقيقه
تحياتي ليكي ياقمر

قصاقيص يقول...

البتاع
ــــــــــــ
أهلا أهلا بنجم وحبايب نجم
نورتيني
:::::::::::::
ميرسي علي الراي الجميل ده
وده مدح يارب اكون استحقه
:::::::::::::
يارب دايما اكون بستحق تعليقاتك الجميله دي
تحياتي

محض روح يقول...

ياه
هو انا اتاخرت عنك كل ده
بجد انا اسفه
مش عارفه فيه ايه اليومين دول

ما أحوج قلبي ياعمري
. بهواك إلي عمرٍ ثاني
فأنا في حبك عابدةُ
لا شئ يغير إيمـاني

مبدعه ياحببتي زي العاده
بجد كان نفسي فيه حاجه رومانسيه تكسر الجو العام
ربنا معاكي في
امتحانات
بجد وحشتيني

اشوفك على خير يارب
أرق تحياتي

كراكيب عادل يقول...

انا مش شاعر يا اروبة انتي

علشان انقد نقد ادبي

بس البيت الي مش عاجبني

علشان ناحية دينية فقط

انا اي كلام حلو بيعجبني حتي لو خيال وكلامك بالذات

بس ملناش دعوة بالناحية الدينية

نبقي حلوين

سلام يا امورة

Rosa يقول...

ما أحني ضلوعك سجاني

ياه على الحب الي يخلي من صاحب السجن حد حنين
مي ,مش بقدر اقول اي تعليق قصاد تعبيراتك الي كلها ابداع
ربنا مايحرمناش من جملك وتعبيراتك العبقرية
تحياتي :)

SomeOne يقول...

والله يا مي اللي اعرفه ان مفيش كتاب اسمه فنون الشعر

بس فنون الشعر هي الاوزان و البحور والقافية و المعني

وانا مش بنقدك
انا بقولك انت في القصيدة دي مش مبدعة
يعني انا بدور في شعرك على الابداع
وانا مقلتش ان الصور دي مش جميلة
بالعكس دي جميلة جدا

بس ابداع الشاعر في انه يجيب صور مبتكره وجديدة
وعموما يا ستي انا زي ماقلتلك معنديش كتاب في فنون الشعر
لاني مسمعتش بكتاب بالاسم ده
اما عن الاوزان والبحور والكلام ده
ادخلي اي موسوعة زي ويكيبيديا وانت تلاقي كل حاجة
او ابحثي في جوجل
انا برده معنديش كتب عنهم
بس حسب ذاكرتي ان بحور الشعر
16
اهمهم الطويل

انا كل اللي بقراه
هو الشعر نفسه
وانا عندي هنا في اسيوط مقتطفات المتنبي
و
كأن العمر ما كان- اخر ديوان لفاروق جويدة
و
الديوان الاخير ل صلاح عبد الصبور
و
الرباعيات صلاح جاهين


تحبي ابعتهملك
بريد

اما عن بتحب تقرا ايه ولمين
فانا اكتر حاجة بحب اقرا فيها
هي
visual basic
ودي لغة برمجة
وبحب اقرا عنها من كتب
Microsoft Press

انا امتلك وقريت 11 مجلد عنها
كل مجلد حوالي 2000 صفحة
ومصصم بيها برنامج ادارة سنترال لسة بايعة ب
900
جنيه

وبحب برده اقرا في الكمياء العضوية
اللي جايب فيها امتياز في الكلية مع اني فاشل
وبعيد كل سنة مرتين
وعندي فيها مرجعين كبار ومشهورين

اما عن اخر مرة قريت
لو تقصدي كتاب
فكان من عشر ساعات
كتاب اسمه
حاطب ليل ضجر
ل
عبدالعزيز بن عبد المحسن التويجري

ولو تقصدي عموما
فانا بقال عشر سعات بقرا مدونات
اصلي بعيد عنك متابع
138
مدونة

كلبوزة لكن سمباتيك يقول...

لما دي قصاقيص امال المعلقات تبقى ازاي
جميلة جدا
مشاعرك و كلماتك
تحياتي

طهقان يقول...

مع اني لست من متذوقي الشعر
بس
واضح
ان الكلام دا كبير
قوي
اكبر من سنك بكتير

انت مجال دراستك ايه ؟

elgharep يقول...

كالعادة ممتلئة بالعواطف
كلماتك رقيقة
معبرة
أحييك
الغريب

غير معرف يقول...

مى
اولا انا ماليش فى الشعر اوى وبالنسبالى الى بيكتب شعر ده يبقى فنان جامد
:))
ثانيا شعرك رائع ومعانيه حلوة اوى
بجد تحياتى ليكى
:))

vetrinary يقول...

جميله يا مى
والموسيقى جميله وعاليه اوى
المتدارك انسب بحر فعلا فى النوع ده

غير معرف يقول...

برافو
برافو
برافو
برافو
برافو
...............
لما كان البطل زمان بيروح لحبيبته و يقولها انا بعبدك
تفتكرى هل كان بيبجيب سجادة و يروح يحط حبيبته ناحية القبلة
بكسر القاف لا بضمها
و يروح يسجدلها
؟
طبعا ده تصور ساذج جداااااا
و اتمنى أن يأخذ الناس الشعر على انه شعر
يعتمد فى الأصل على الخيال و المبالغة
..................

قصاقيص يقول...

محض روح
::::::::::::
المهم انك مش نسيتيني وجيتي تطلي عليا حتي لو متأخرة
::::::::::::
كنت هزعل لو مش قريتي البوست ده بالذات
واتنهدت لما قريت تعليقك وحسيت انه عجبك
:::::::::::::::
ربنا يخليكي ليا ياقمر
وانتي وحشاني اكتر
وربنا معانا ومعاكي
كلها كام يوم وانجر الي المقصله انا كمان
تحياتي ياقمر
ومش تغيبي عليا تاني

قصاقيص يقول...

كراكيب عادل
::::::::::::::
الله
"أروبة_ أمورة"
حسستني وكأني سعاد حسني في صغيرة علي الحب
بجد لو كنت بهدلتني في تعليقك حتي كنت ولا هحط في بالي مقابل الكلمتين الحلوين دول
بس اقول ايه ...كلمتين حلوين وتعليق مثقف ومهذب
واكيد طبعا ما إختلفناش علي سبب عدم حبك للبيت
زي ما انا توقعت بالظبط.....مفهوم معين وصلك من ورا ألفاظ البيت
بس انت وانا متأكدين إني مش قصداه
::::::::::::::
تحياتي ليك
وميرسي علي متابعتك وإهتمامك

قصاقيص يقول...

Rosa
:::::::::
ربنا مايحرمنيش أنا من كومنتاتك الرقيقه دي
بجد بتسعديني بكل زيارة وكل كومنت
دايما يارب منوراني

قصاقيص يقول...

شادي فايد
:::::::::::::
تخيل ياصديقي انا كمان ما أعرفش كتاب بإسم فنون الشعر
اصلي كنت قاصدة بسؤالي ناحية خامسة خالص
::::::::::::
المهم ماعلينا
للأسف كنت بدور علي أي كتب بتتكلم عن الشعر ومكتبتك يمكن اقل من مكتبتي في الجزئيه دي
:::::::::::
ربنا يعينك ع البرمجه وكلاكيعها والعضوية ولوغاريتماتها
:::::::::::::
ومفيش داعي تكلف نفسك مصاريف شحن وطرود وكلام من ده...اللي عندك في شقة اسيوط معايا
متعوضة لما ترجع بالسلامة واكلفك شحن وتفريغ كمان
::::::::::::::
وربنا يعينك علي ال 138 مدونة اللي اكيد مدونتي ارخمهم
:::::::::::::
تحياتي ويارب دايما منورني

قصاقيص يقول...

Sampateek
:::::::::::::
الله علي التعليق
بجد قمة الرفع للروح المعنوية والمعدنية
::::::::::::::
يارب اكون فعلا بستاهل الكلام الجميل ده
نورتيني
ويارب دايما اتشرف بزياراتك ليا

قصاقيص يقول...

طهقان
::::::::::::::
زيارة بجد أسعدتني جداص من صاحب الدم الخفيف والمدونة اللذيذة
"طهقان"
::::::::::::
شرفتني
وفعلا معاك حق: الموضوع كبير كبير كبير
:::::::::::
عموما انا لحد دلوقتي" مشروع دكتور"..ربنا يستر ومايفشلش
دعواتك
نورتني بجد بجد

قصاقيص يقول...

elgharep
:::::::::::
فرحت جدا جدا لما لقيت تعليقك
من زمان ماشرفتنيش بزيارتك وتعليقك الجميل ده
::::::::::::::::
ميرسي علي اهتمامك وعلي رأيك الجميل في القصيدة المتواضعه دي
تحياتي
نورتني

قصاقيص يقول...

shayma
:::::::::::
حياتي ليكي انتي
بجد نورتيني
وتعليقك فرحني اوي
ميرسي لرقتك وذوقك
منوراني

قصاقيص يقول...

vetrinary
:::::::::::
أشهد أن لا إله إلا الله

:::::::::::::::
الحمدلله
أخيرا حاجه ليا عجبتك من غير تعقيب علي وزن او قافيه او موسيقي او حرفيه شعريه
ولا حتي حنفيه عمومية
:::::::::::::::::
نورتني وفرحتني وفتحت نفسي
ههههههههههههه

قصاقيص يقول...

أحمد مختار عاشور
:::::::::::::::::::::
يا الـــــــــلـــــــــه
أنا أخدت نفس عميق لما لمحت صورتك وسط الكومنتات يا استاذي
مش عارفه بقي كان تقريبا خليط من الخوف من رايك ومن الفرحه بتعليقك اللي بجد كنت منتظراه
وبجدلما قريت "تنفست الصعداء"..مش برضوا بيقولوها كده؟!!؟
برافو 5
وكمان تعقيب فلسفي تنويري جميل علي تحليل القصد من ورا الفاظ الابيات
:::::::::::
بجد بجد انا بحسد نفسي عليك
وعلي متابعتك
:::::::::
اشكرك بجد
ومنورني كالعادة وفوق العادة

قصاقيص يقول...

شريف
::::::::::::
انا اسفه بجد ياشريف لو كنت اتغيبت عن متابعتي لمونتك
بالرغم اني زيارتي ليها كانت حقيقي بتسعدني
بس صدقني ظروفي ملخفنه بقالها فترة..حتي النت بيعاندني وعمو بتاع السايبر بيرخم هو كمان
معلش سامحني
:::::::::::::
رأيك دايما بيفرحني ومتابعتك بتفرق معايا
يارب دايما منورني
ميرسي علي كلامك الجميل
واسفه مرة تانيه
واوعدك: غلطة ومش هتعود

SomeOne يقول...

سبحان الله

يعني انا بدور في شعرك ع الابداع
وانت
كنت قاصدة بسؤالك ناحية خامسة خالص

عموما مدونتك مش ارخم مدونة ولا حاجة

بس صاحبتها هي اللي شكلها
رخمة
:P

قصاقيص يقول...

شريف
:::::::::::
يعني مش بس بتخجل تواضعي بكومنتاتك الجميله
لا وكمان بتحرجني بذوقك وسعه صدرك
ميرسي ليك اوي اوي
واكيد مفيش اخوات اجمل من كده
ميرسي اوي علي نصيحتك الغاليه
ويارب دايما منورني
تحياتي

قصاقيص يقول...

شادي فايد
:::::::::::::
معلش بقي
العتب ع النظر
::::::::::::::::::::::
والله معاك حق.....ده حتي انا نفسي كتير ببقي مش مستحملني ولاطايقني
:::::::::::::::::::::
سيبك سيبك
المهم دلوقتي:منين بيودي علي فين؟!!؟؟
ههههههههههه
"""""""""""""""""""
تحياتي
وربنا يصبرك

kafrawy يقول...

تصفيق حاااااااااااااااااااااااااااد


سؤال
هما لية كل بنات المنصورة بيحبو ا
اللون pink

قصاقيص يقول...

kafrawy
::::::::::::::
زيارة جميلة فرحتني اوي
...............
نورتني بجد
................
عموا يظهر اننا كبنات المنصورة متأثرين بالدنيا الربيع والجو البديع
فبقت الحياة عندنا لونها.....بمبي
هههههههههههه
::::::::::::::
نورتني
ويارب دايما منورني

نقطة مية يقول...

اول مرة ازور مدونتك بس عجبتني..اسلوبك بسيط و يشد و مليان احساس

قصاقيص يقول...

نقطة مية
::::::::::::::;
ويارب مش تكون اخر مرة
بجد نورتيني
وميرسي علي الكلام الجميل الرقيق ده
بجد كومنت رقيق وزيارة ارق
تحياتي
وياريت تشرفيني دايما

حلم الحرية يقول...

بجد مش عارفة اقول ايه

كل ما بقرالك بالاقي نفسي بتتوه مني الكلمات عشان اعلق علي كلماتك

ما شاء الله عليكي
باحس ان الكلمات والحروف بيسيبوا نفسهم بين ايديكي تشكليهم زي ما انتي عايزة

ربنا يخليلنا قلمك اصدي كيبوردك

تحياتي

قصاقيص يقول...

واحدة بتحب البلد دي
:::::::::::::::::::::::::
في كل مرة بتزوريني بتسيبيلي كومنت ارق واجمل
بجد ميرسي علي رقتك ومتابعتك
وعلي دعواتك الحلوة
منوراني

سندباد يقول...

صدقيني دي مش هاتكون اخر زيارة عدد متابعينك زاد واحد تحياتي

قصاقيص يقول...

sendbad
:::::::::::::
انا اصلا مستحيل اسيب حد تعليقه جميل ورقيق كده تكون دي اخر زيارة ليه عندي
:::::::::
بجد زيارتك وتعليقك اسعدوني اوي
ويشرفني متابعتك ليا اوي
تحياتي
ويارب دايما منورني

غير معرف يقول...

ماشاء الله تبارك الله اللهم زيد وبارك ....انا اقولها وبكل فخر نزار قباني بتاع مصر